Seba ke tecrîdê serê Rayberê Şarê Kurdî Abdullah Ocalanî biqedîyo grevê vêşanîye yê ke bi serkêşîya Leyla Guvene dest pêkerdîbî dewam kenê. Parlamenterê HDP’yî Mîthat Sancarî derheqê tecrîdê serê Ocalanî de û weçîntişanê cayîyan de ANF’yî rê qisey kerd. Sancarî ard ziwan ke tecrîdê serê Ocalanî aşitîya welatî rê xizmet nêkeno û vat, “Herême de rojdemê her kesî tecrîd o. Bi tecrîdî şer hîna beno xorî, gama ke tecrîd yeno girankerdene polîtîkayê şerî kewenê dewre.

Eke tecrîd raste ra bêro wedaritene do nê erdan rê huzûr, aşitî û yewîye bêro. Şarê ma zî nê vîneno û goreyê nê ercneno. Şarê ma aşitîyêka bianore wazeno. Keso ke do nê erdan rê aşitîye bîyaro zî bewlî yo. Her kes zano ke adresa aşitî, dîyalog û muzakereyî Îmrali yo. Şarî na rastîye bi çimanê xo dîye.”

‘SERÊ RANTÎ RA WAZENÊ KE XO RÊ HETGÊRAN VIRAZÊ’

Sancarî bale ante ke îttîfaqê hemverê Kurdan ê AKP-MHP’yî her roje keweno prosesêkê neweyî û qiseykerdişê xo wina domna: “AKP û MHP’yî verê cû hemverê Kurdan de bi dizdî şer kerdêne la nika bi hawayêkê eşkerayî şer kenê. AKP-MHP hemverê îradeyê û nasnameyê şarî de polîtîkayan rayra benê. Rîyê nê polîtkayan ra Mêrdîn û xeylî bajaranê bînan de do AKP reyan vînî bikero. No tena reaksîyonêk hemverê AKP-MHP’yî de nêyo. No wayîrvejîyayîşê nasname û îradeyê xo yo.

Wextê weçînitişî de xeylî çîyî serûbin benê. Cayo ke xizmet nêkerdo ûca ra biisrar vanê ke ma xizmet kerdo. No zî sey verê weçînitişî rişwetêk o. Bi rant û bi hetgêrîye wazenê ke şarî sîstemî rê girê bidê. No terz verî zî estbi la nika bi hawayêkê cîyayî no terz reyna fînayo dewre. Serê rantî ra wazenê ke xo rê hetgêran virazê. AKP do goreyê weçînitişanê bînan xeylî cayan de reyan bikero vînî, HDP zî do reyanê xo bikero zêde.”

MA ŞARÊ XO RA HÊZ GÊNÊ

Sancarî derheqê weçînitişanê cayîyan de qiseykerdişê xo de vat HDP rixmê heme tedayan de bi hawayêkê bihêzî xebatanê xo domneno. Sancarî ard ziwan ke hemverê HDP’yî de her ca de tedayî estê û vat “Mêrdîn şaristananê ke nê tedayî resayê dereceya tewr berze ra yew o.  Çend rojî verî ma Qoser de mîtîngêk viraşt û înan roja peyêne de destûrê mîtîngî da. Rixmê heme hêriş û astengkerdişan de şarê Qoserî ver bi cayê mîtîngî herekîya.

Ma dewrêkê zaf zorî ra ravêrenê labelê HDP tim rastê hêrişanê winayênan ameyo. Hêrsê şarî yê hemverê nê hêrişan do xo 31’ê Adare de sindoqan de ramojno. Se beno wa bibo ma do îradeyê xo ra tawîz nêdê. Xeylî xebatkarê ma ameyî destbendkerdene û tepiştene. Embazê ma çiqas bêrê tepiştene zî do cayê înan veng nêmano. Hemverê nê wayîrvejîyayîşî de mesuldarîya ke kewena doşanê ma ser bena zêde. Ma zî bi nê hawayî şarê xo ra hêz gênê.”