Hemvervatoxê Partîya Çep a Keske yê şaristanan û Hemserekê HDPyî yê şaristanan Merkezê Pêroyî yê Partîya Çep a Keske de kom bîyî. Hemserekê Pêroyî yê HDPyî Mîthat Sancarî destpêkê kombîyayîşî de qisey kerd.

Sancarî vat: ''Derheqê weçînayîşan de kombîyayîşê ma yê ercnayîşî dewam kenê. Kombîyayîşê ma yê bi şarî zî dewam kenê. Ma do dima bi konferansî prosesê kongre biqedînê. Ma bi zelalî vanê ke ma weçînayîşan de hedefê xo nêvistê destî. Zaf babetî est ê ke ganî bipersîyê. La ganî bizanîyo ke weçînayîşî rewşêka neheqe û needîle de qewimîyayê.

Îtîfaqê AKP-MHPyî prosesê weçînayîşan de pêro îmkanê xo seferber kerdî, operasyonî kerdî, ma rê astengîyî vetî. Netîceyê weçînayîşan binê nê tedayan de vejîyayî werte. Ma kêmasî û xeletîyanê xo zerrî ra do bîyarê ziwanî. Eke ma rolê têkoşînî û serkêşîye bigêrê xo ser, helbet ganî ma bivînê ke hewceyê ma bi newebîyayîşî est o.

Gever de doman Erdem Aşkan pê wesayîtê zirxînî ame qetilkerdene. Ma vînenê ke polîtîkaya bêcezaverdayîşî û polîtîkaya cezakerdişê kurdan dewam kenê. Embazê ma rixmê biranê Mehkemeya Heqanê Merdiman a Ewropa (MHME) tepişîyenê. Nê pêro mojnenê ke verê ma de têkoşînêko bêhempa est o. Ma neçare yê ke hîna bi qerardarî û rêxistinkerdeyî têkoşînê xo rê dewam bikerê.

Nêmeyê komelî vurîyayîş wazeno. Ma do nê erkî bigêrê xo milî. Ma bi rolê serkêşîya vurîyayîşî têbigêrê. Seba çareserîya meseleya kurdan komel pabeyê ma yo. Ganî her kes xeletîyanê xo raşt bikero û tewrê prosesê rexnkerdiş û rexnedayîşî bibo. Vurîyayîşê komelî pabesteyê têkilîya ma ya bi şarî yo. Nê esasî ser o Partîya Çep a Keske û HDP rexneyanê xo do bidê. 

Hewceyê ma bi newekerdişî-newebîyayîşî est o. Eke ma wazenê nê welatî newe bikerê, ma do hêverî xo newe bikerê. Ma do waranê rêxistinîye, komelkî û sîyasîyan de prosesê newebîyayîşî bîyarê ca. Belê kêmasîyê ma est ê la bawerî û îradeyê ma zî est ê. Ma do şarî reyde bivurnê û rayîrê Komara Demokratîke abikerê. Ma do prosesê rexneyan şarê xo verî de îdare bikerê.

Rayîro Hîrêyîn xeta ma ya sîyasî û metodê ma yo. Ma do nêverdê sîstemî ma xera bikero. Ma do astengîyan verê xo ra wedarnê. Hêvî û têkoşîn şorişêko mende yo. Kêfweşîya sîyasî dişmenê hêvî û têkoşînî yê. Ma do mesuldarîyanê xo bîyarê ca, rexneyanê xo bidê û rayîrê xo ra dewam bikerê.''