Hemserekê Pêroyî yê Partîya Demokratîke ya Şaran (HDP) Mîthat Sancarî kombîyayîşê grûbe ya partîye xo de qisey kerd.

Qiseykerdişê Sancarî ra qismêk wina yo:

''Xora ma zanê vînîkerdişî ra dima vîjnayîşî newe kenê. Ma no 7ê hezîrane de dî. Dima ra 31ê adre de ma eynî çî ciwîyayî. Ma no zî pêrune pîya dî. Vîjnayîşê Îstanbulî zî newe kerd û ser nêkewtî.  Ma do vîjnayîşê verê ma de zî reyna înan rê bidê vînîkerdene. Bado ke vîjnayîşî vînî kenê cade cixizê kenê û qeydan bedilnenê. Seba ke reyna vînî merkerê hêrişê HDPyî kenê. Îradeyo ke nêwazenê nasbikerê do no mucadeleyo demokratîk bimojno nînan rê bido naskerdene.

Pê qanûnanê neweyan wazenê OHALî bikerê mende. Qanûnanê vera komelî vejenê ke îqtîdarê xo bipawê. Hemwelatîyanê nê welatî sey tehluke vînenê û her warî bi rêzilê asayîşî genê binê ablûqa. Semedê qedînayîşê bêkarîye û feqîrîye çîyêk nêkenê. Têna karê înan qanûnê asayîş ê, pê caardişanê polîsan, operasyonanê hukmî, şarî tehdît kenê û wazene peyser game ci rê bibê eştene. Pê vilakerişê tersî wazenê îqtîdarê xo bipawê. La şima zanê feydeyê tersî ecelî rê çîn o.

Eke vera hukmatêkê tersûnekî hêzê jîhatî estê, serkewtişê hukmatî mumkun nîyo. HDP sembolê û cesaretî yo, HDP çimeyê hêvî yo. Çoka ling şaya ma ver. Xora hukm zî destê înan de yo. Nimûneyê nayî yo peyên ma pê tepiştişê Omer Faruk Gergerlîogluyî dî. Rixmê heme zext û neheqîye Gergerlîogluyê sînayeyî verê mînan de milê xo çewt nêkerd, no înan rê bi derd.

Şar bêçare nîyo û nê îqtîdarî rê mehkum nîyo. Ma her warî de mucadeleyî gird kenê. Meclîsê ma yê cinîyan vizêr Kampanyaya ''Feqîrîya Cinîyan rê Nê'' daye desptpêkerdene. Cinîyî vera îqtîdaro ke heqê înan pinpay kerdî, mucadeleyê xo rê dewam kenê. No terso tewr pîl ê îqtîdarî yo. Xora înan qanûnê bingeyî werte ra wedarit. Sîstemê weşîye zî sey rantî şuxulnenê. Pandemî de herinda weşîya şarî de karê xo esas gênê.Têna pê mucadeleyê hemparî ma eşkenê nê hukmatî ra bixelisîyê. HDP estuna mucadeleyê hemparî ya.  No îqtîdar hêzê çareserî nê çimeyê probleman o. Merkezê afernayîşê krîzan o. Tehdît û zordarîyê nêeşenê verê ma bîgîrê. Têna HDP eşkeno Tirkîya muneqeşeyanê darbeyanê sîvîl û leşkerîyan ra bixelisno. Ma do qerardar mucadeleyê xo bidomnê.''