Hemserekê HDPyî yê şaristanan Anqara de otêlêke de pêvînayîşî kenê. Hemserekê Pêroyî yê HDPyî Mîthat Sancarî destpêkê kombîyayîşî de qisey kerd.

Qiseykerdişê Sancarî ra tay noqtayê girîngî wina yê: ''Ma çarçewa Kampanyaya 'HDP her ca de yo' xeylêk şaristanî zîyaret kerdî. Ma dî ke şar wayîrê HDPyî vejîyeno û moralê înan berz o. Her roje vera partîya ma operasyonî estê la ma payan ser o yê. Ma şarê xo reyde qisey kerd, meseleyê înan goşdarî kerdî, doneyî arê dayî. Nika ma do nînan ser o nîqaşan bikerê û çareserîyanê meseleyan pêşkêş bikerê.

Meseleya ma ya verêne meseleya kurdan a ke çareserîya ci estbîyayîşê HDPyî yo. Reyna krîzo ekonomîk û polîtîkayê şerî zî rojdemê ma deyê. Rojdemê ma yo taybet zî weçînayîş o. ŞArê ma semedê weçînayîşî amade yo û pê hêzê HDPyî bawer o. Ma dima ke meclîsanê xo reyde kombîyayîşan bikerê deklarasyonêk bidê ke no deklarasyon do xerîtaya ma ya rayîrî eşkera bikero.

Xora binvistişê îqtîdarî hedefê ma yo la ganî her kes qasê binvistişê îqtîdarê AKP-MHPyî serkewtişê xo zî hedef bikero. Ma weçînayîşî sey firsendê destpêkerdişê neweyî vînenê. Goreyê anketan zî cara îqtîdar ho bin keweno. Ganî ma binê sîwana îtîfaqê demokrasî de bêrê têhet û bicesaret bibê.

HDP rixmê pêro bedel û rîskan zî rayîrê xo rê dewam keno, bedelan dano. Semedê destpêkê neweyî haştîye, demokrasî, edalet şert ê. Ma do nînan bîyarê ca. ''

Qiseykerdişê Sancarî ra dima kombîyayîş bi hawayêkê girewteyî dewam keno.