Partîya Newe ra Ronayîşî ya Sosyalîste (SYKP) kongreya xo ya 4. kena. Hemserekê Pêroyî yê HDPyî Mîthat Sancarî kongre de rojdem ercna.

Qiseykerdişê Sancarî ra beşêk wina ya:

''Bingeyê nê îqtîdarî de gonî û zûrî estê. Sîstemêk nê îqtîdaran ber ano. Heta ke no sîstem nêvurîya vurîyayîşê îqtîdaran çîyêk îfade nêkeno. Ma Qezayê Susurlukî û Erdlerzê Marmara yê 1999î de dî ke no sîstem pûyaye yo. Ma o çax sey komelî nêeşkayî sîstemê çeteyan çin bikerê.  Nika îtîrasê Sedat Pekerî reyna puyayîya nê sîstemî deşîfre kenê. Ma hedef kenê ke hem sîstemî hem zî îqtîdarî bivurnê.

Ez bi xo şîya waranê felaketê şewatî. Uca de felaketo raştikên şiklo bêar û bêexlaq ê îdareyê îqtîdarî yo. Îqtîdar semedo ke sûcanê xo mîyan bikero ziwanê nefret û nîjadperestî geş keno, hîşmendîya nîjadpereste ra çîyêk paweno. Bi nê hawayî kurdan rê dişmenîye yena kerdene. Îqtîdar wazeno çeteyanê xo bivejo kuçeyan û mîyanê komelî de ters vila bikero. Vera polîtîkayanê nîjadperestan çare yewîya têdûşte û azade ya şaran a.''