Partîya Demokratîke ya Şaran HDP) bi wesîleya serrgêra vîjnayîşê cayîyî yê 31ê adare ya 2019î Mêrdîn de bi sernameyê ''Semedê îradeyê şaran edalet'' forûm organîze kerd.

Hemserekê Pêroyî yê HDPyî Mîthat Sancar û Sîyasetmedaro Kurd Ahmet Turk sey qiseykerdoxî tewrê forûmî bîyî. Wekîlî, hemşaredarê ke wezîfeyê înan ameyî xespkerdene, endamê şaredarîyan, îdarekarê HDP û DBPyî û xeylêk temsîlkarê rêxistinanê komelî sîvîlî tewrê ci bîyî.

Forûmo ke salona konferansî ya yew  otêle de ame kerdene pê pêramotişê sînevîzyonî dest pê kerd.

Hemşaredarê Şaredarîya Bajarê Pîlî yê Mêrdînî Ahmet Turko ke wezîfeyê ci ame xespkerdene vat: ''Sîyasetê kurdan semedê hemeyan azadîye wazeno. Êyê ke nayî nêwazenê ewro hêrişê sîyasetê kurdan kenê.Wazenê ke ma biqedinê, çîn bikerê. Sere de şarê kurdî ganî heme kesê ke bawerîya înan demokrasîyî rê esta û wayîrê wîjdanê vera nê sîyasetî vejîyê. Qefilnayîşê partîyan xora ma rê muhîm o la ma bêçare nîyê. Ma afernayox ê, ma pê bawerê ke ma do ser bikewê.''

Mîthat Sancarî zî nê vatî: ''Hêrişê vera HDPyî îradeyê şarê kurdî hedef genê. Reyna yeno waştene ke hetê demokrasîyî yê Tirkîya zî bêrê çînkerdene. Coka ma qerar girewt ke têna pê munaqeşekerdişî nê ganî ma pratîk de vera nê hêrişan vejîyê. Ma kombîyayîşê verênî Mêrdîn de kenê. Di serrî verî na roje vîjnayîşê cayîyî amebi kerdene û îqtîdar bin kewtbi. Aktorê nayî zî partîya ma HDP bî. Her kes zano ke stratejîya me hem îradeyê şarê kurdî vet meydan hem zî rojawan de îqtîdarî rê da vînîkerdene. Sebebê hêrişê îqtîdarî yê vera partîye û şarê ma ra yew no yo. Xeylêk cayan de embaz û hemrayê ma destbend kerdî, tepiştî û nika zî vera ma dewaya qefilnayîşî akerde. No îdîaneme huqûqî nîyo hetê îqtîdarî ra ame amadekerdene. Xora cewabê nîna şar Newroze da. Ma do HDPyî bidê ciwîyayene, pîlêr bikerê û Tirkîya de giranîya ramojnê. Ma do têkoşînê xo xurtêr bikerê û bi edalet û demokrasîyî nê welatî rê haştîye bîyarê.''