Hemserekê Pêroyî yê HDPyî Mîthat Sancar û Wezîra Karanê Teberî yê Almanya Annalena Baerbock ameyî têhet. Pêvînayîşo ke Anqara de ame kerdene wekîlê HDPyî Felelnas Uca û Şevîne Coşkun zî tewrê ci bîyî. Temsîlkarê partîyanê sîyasîyan ê Almanya zî pîya bi Baerbocke tewrê pêvînayîşî bîyî.

 Pêvînayîş de dewaya qefilnayîşî ya vera HDPyî, dewaya Kobanê, rewşa sîyasetmedaranê HDPyî yê ke zîndan de yê û hêrişê îşxalî ameyî qiseykerdene.

 Sancarî ard ziwan dewaya qefilnayîşê HDP, hêrişê îşxalî û tehdîtê vera Rojawanî pabesteyê meseleya kurdan ê û vat heta ke na mesele nêro çareserkerdene îqtîdarê Tirkîya do naye bişuxulno û teber û zere de polîtîkaya şerî bido domnayene.

Sancarî vat: ''Sebebê ke îqtîdar semedê operasyonanê teberê sînorî erzena werte raşt nîyê. Îqtîdar seba ke ameyo nuqtaya rijnayîşî keno ke pê nê oprasyonan payra bimano.''

Sancarî vat zaf muhîm o ke Almanya polîtîkaya xo ya teberî serê ercanê demokratîkî de bi waştîşê haştîya herêmî  û cîhanî rayra bero.