Hemserekê Pêroyî yê HDPyî Mîthat Sancar çarçeweya zîyaretê Hatayî yo ke bi sloganê 'Çareserî ma yê, şer û îşxalî rê ney'  keno, roja peyênê  de qeza Antakya de temsîlkaranê rêxistinanê komelê sîvîlî û partîyanê sîvîlan dir ame têhet.

Sancarî ke proseso sîyasî ercna vat: ''Ma nêwazenê têna pê programê partîya xo sînordar bimanê. Waştişê ma oyo ke ma pêro pîya rayra şirê. Eke sebebê rijnayîşê ekonomîkî hol merê famkerdene çaserkerdişê ci zî zehmet beno. Çimeyê welatî paştgeranê îqtîdarî û şerî rê yenê xerckerdene. Şar zî çend şino dahîna feqîr beno. Vêşanîye pêde pêde vila bena. Coka ganî verê ratnî û polîtîkaya şerî bêro girewtene û semedê naye zî yewîtîye hewce kena.''

Sancarî bale ante polîtîkaya şerî ya dewleta tirke ser û wina dewam kerd: ''Rîyê şerî ra no welat feqîr beno.  Hetê bînî ra teberê sînorî de eynî polîtîka yena rayraberdene. No îqtîdar pê şerî ho payra. Îqtîdar hetêkî ra çimenayê welatî semedê şerî xerc keno û şarî feqîr keno û hetê bînî ra zî şaran verdena yewîbînan. Ganî verî vera şerî yewîtîyêka hêzdare bêro raameyene. Her hetî ra welat de rijnayîş est o. Huqûq werte ra ameyo wedarnayene. Demokrasî xora hinda leteyê ci wirdî zî erdî de nêmendî. Gala heqanê merdiman kerdiş sey yarî yeno famkerdene. Nê polîtîkayê zext, zulm û qedexeyî her roje welatî bênefes verdenê. Zextê vera ziwan, bawerî û nasnameyan, planê tesfîyekerdişê ke bi rayîrê hukmî yenê kerdene pêro pabesteyê yewbînan ê. Welato ke tede edalet çîn o de mumkun nîyo ke nefes bêro girewtene. Tena bi yewitîyêka hêzdare ma eşkenê vera nînan bigêrê. Destê nê îqtîdarî de zaf kayî est ê. Coka ganî heme hêzê demokrasîyî, kesê ke edalet  û azadîye wazenê bibê yew û têkoşînê hemparî bikerê.''

Sancarî vat: ''Ma wazenê ke wa şerê Sûrîye hinda biqedîyo û haştîye bêro herême. Inkey îqtîdar semedê Sûrîye mesajanê dîyalogî dano û keno ke xo sey hetê çareserî nîşan bido. Patîya ma xora tim hetê dîyalogî de ya. La eke ma raştê çareserî wazenê ganî ma samîmî bi û nê dîyalogî mekerê hacetê şeranê bînan. Êyê ke dîyalogî semedê xorîkerdişê şerî şuxulnenê xeyrê înan nêreseno nê welatî û herême. Ê xirabîya pîle kenê. Coka ma vanê  no îqîtdar gama ke Tahran û Soçî de ber bi ber gêrayêne waştişê ci çareserî û dîyalogê Sûrîye nêbi. Waştişê ci destpêkerdişê şerê vera Rojawanî yo. Ganî ma hîşyar bi vera kurdan mudaxaleyêko newe ho yeno kerdene. No têna vernî rijnayîşanê neweyan akeno, dejanê neweyan aferneno û probleman  xorî keno. Semedê haştîya herêmkîye destê ma ra çî yeno ganî ma bikerê. Ganî ma pêro pîya bikerê. Eke ma altenatîfekê raştî vejê werte, ma o çax eşkenê nê îqtîdarî bişawê. No alternatîf zî bi yewîtîya hîraye û îtîfaqî beno.''

Badê qiseykerdişê Sancarî aktîvîte çapenîye rê qefilnaye dewam kerde. Programê di rojan ê Hatayî yê Sancarî bi nê têhatameyîşî qedîya.