Hemserekê Pêroyî yê Partîya Demokratîke ya Şaran (HDP) Mîthat Sancarî derheqê hêrişê vera banê HDPyî yê Îzmîrî de merkezê partîye de eşkerayîye daye.

Sancarî qetilkerdişê Denîze Poyraz sey qirkerdişî name kerd û vat: ''Saeta ke hêrişê vera rêxistina ma ame kerdene ma kombîyayîşêk plan kerdbi ke 40 kesî ganî tewrê ci bibîyênî. La tay sebebanê lezebazan ra kombîyayîş pey de ame eştene. Tîya plan eşkera yo. Qirkerdişêk ameyo plankerdene. Qetilkarî xora sey têna kiştişê yew kesî di guleyî nêeştî, guleyî varnayî. Yanî hêrişê ci ra yeno fehmkerdene ke vato kam esto wa bimiro. No qirkerdiş eynî wextî de provokasyon o.  Ganî her kes nayî bivîno ke no provokasyono zaf tehlukeyin o.

Îqtîdar pê kaosî xo weye keno. Pê tehdît û şantajî wazeno vengê muxalefetî bibirno. Vera HDPyî heme metodan şuxulneno ke vegnê ci bibirno. Xora Dewaya Kobanê zî nê semedî ra ameye akerdene. Îqtîdar o ke tim partîya ma tehdît keno berpirsîyarê nê hêrişî yo. Ewro ra tepîya zî eke cînayet û qirkerdişî bibê berpirsîyarê îqtîdar o.

Banê ma yê Îzmîrî yew serrî yo ke binê ablûqa de yo. Tim provokatorî şawîyenê uca. Dormeyê ci de xeylêk polîs û wesayîtê asayîşî estê.  No şexis destê ci de çeke rehet rehet kewtê banê ma la polîsî nayî nêvînayîşî ra yenê. Ma do peyê nayî cameverdê û hesabê ci bipersê. Ma do pê sîyasetê demokratîkî nê provokasyonan pûç vejê. Berpîrsîyarî do verê şarî de hesab bidê.

Tîya têne HDP hedef nêyo. Wazenê pêkewtişê zereyî vejê.  Ganî her kes nayî zelal bivîno.  Ma tîya ra veng danê ke  wa her keso ke hetê haştîye, demokrasî û edaletî de yo semedê ameyoxê ma dormeyê HDPyî de bêro têhet. Ma pêro pîya bi sîyasetê demokratîkeî plananê leymin û gonîn ê kaosî vindarnê. Ganî helêke cuwa ver ma bêrê têhet û vera nê kayê tarîyî tewirê hemparî ramojnê. Ganî ma cedê vengê xo berz bikerê. Beno ke siba erey bo.

Dejê ma pîl o. Waya ma Denîze hema ciwane bî. No yew qirkerdiş o. No hêriş vera ma hemeyan o. Denîza sînayeye ma soz danê, ma do  cuya to ya bianore û  têkoşînê to bidê domnayene.  Denîza sînayeye ma do cuya demokratîke ya ke ti ci rê hesret bîya û ameyoxê rindî ke to xeyalê ci kerdêne û haştîye ke to sey vilike awedayêne miheqeq bîyarê. Ma soz danê to û sand wanenê.''