HDPyî Kongreya xo ya 5. ya dima kombîyayîşê xo yo verên kerd. Kombîyayîş de endamê Heyetê Rayberdişê Merkezî (MYK) û bernameyê xebate ameyî eşkerakerdene. 

Hemserekê Pêroyî yê HDPyî Mîthat Sancarî kombîyayîş de qisey kerd û da zanayene ke înan kongreya xo bi coşêkê pîlî kerda. Sancar qiseykerdişê xo de nê noqtayan ser de vindert: 

''Ma nê welatî de partîya çareserîye û hêzo dîyarker ê. Welat de nika krîzê pîlî est ê la îmkanê çareserîye zî tewr zaf nika est ê. HDP bi îdîaya çareserkerdişê krîzan rayîrê xo rê dewam keno. Kongreya ma tewr zaf no wezîfeyo giran kerdo ma milî. Nika ma prosesêkê zehmetî de têrî yê. Prosesê tasfîyekerdişî bêmabên dewam keno. Ma do heqê xîretanê ablûqa ra bêrê û rayîrê xo ra dewam bikerê. Partîya ma çareserîyanê raştan pêşnîyaz kena. 

Bira HDPyî seba prosesêkê neweyî xoverdayîş û bîyayîşê hêzê awankerî yo. Dewaya Kobanê, hêrişê namerdî nêeşkenê verê ma rayîrê ma ra bizivirnê. Kêmasîyê ma est ê xora. Nê şeş mengê verê ma zaf girîng ê û nêzdî de do her çi zelal bibo. Ma neçare yê ke xo seba nê prosesî amade bikerê. Çareserî ma yê û ma wayîrê bernameyê çareserîye yê. Plan û senaryoyê ke tede HDP çin o, nêeşkenê welat ver bi destpêkêkê neweyî berê. Ma pê qerardar ê ke nê senaryoyan biqedînê. Ma do ney sayê bernameyê xo yê sîyasî û paştdayîşê xurtî yê şarî ra bikerê.

Îqtîdar nika tersê binkewtişî ra peyê plananê tehlukeyînan de yo. Hêrişê îşxalî yê vera Rojawanî rojdem de yê. Îqtîdar armanc keno ke pê çinkerdişê destkewteyanê kurdan estbîyayîşê xo rê dewam bikero. Ma do vera plananê şerî ganî îtîfaqê demokrasî awan bikerê. Seba ney ganî ma bi qerardarî têkoşînê demokrasî bidê destpêkerdene. Bi na wesîle ma pêro hêzanê sosyal-demokratan û muxalefetî hişyar kenê ke bêrê ma vera plananê şerî û senaryoyanê kaosî hişyar bê. Bêrê ma îradeyê hemparî bimojnê.''