Bi serkêşîya Otonomîya Kulturî ya Kurdan a Erşovî qezaya Erşovî ya şaristanê Saratovî yê Federasyonê Rûsya de seba wedartişê tecrîdê serê Rayberê Şarê Kurdî Abdullah Ocalanî grevê vêşanîye ame destpêkerdene.

'HETA AZADÎ BÊRO DESTFÎNAYENE…'

Vîst kesî tewrê grevê vêşanîye yo ke Merkezê Kulturî yê Kurdan ê Erşovî de ameyo destpêkerdene bîyî. Hetkarê hemserekê Otonomîya Kulturî ya Kurdan a Erşovî Mîrzaelî Yusubovî vat: ‘‘Heqê Kurdan esto ke qedera xo tayîn bikerê. No heqêqo unîversal o. Ewro şar her çar dorê dinya de seba Rayberê Şarê Kurdî Abdullah Ocalanî pay ra yo. Kurdî heta biresê azadîye do çalakîyanê xo û mucadeleyê xo bidomnê.’’

'GANÎ TEWR ZAF CINÎYÎ WAYÎR VEJÎYÊ'

Sereka Meclîsê Cinîyan ê Erşovî Gulîzer Yusubova zî nê vatî: ‘‘Ganî tewr zaf cinîyî Rayberîye rê wayîr vejîyê. Rayberîyêk ke seba azadîya cinîyan hende mucadele dayo ganî nê halê tecrîdî rê ê hîna zaf reaksîyon ramojnê. Nê çalakîyê ke serkêşîya ci Leyla Guvene kena ganî hetê cinîyanê Kurdan ra bêrê paştîdayene û heta tecrîd nêro wedartene nêrê vindarnayene.’’

Çalakîye de çalakwanê ke çar perçeyanê Kurdistanî de û teberê welatî de kewtê grev zî ameyî silamkerdene.