Verê bînaya Neteweyanê Yewbîyayeyan (NY) a  Cenevre yê Swîsre de seba azadîya Rayberê Şarê Kurdî Abdullah Ocalanî 25ê çeleyê 2021î ra nata her çarşeme çalakîya roniştişî yena kerdene. Vizêr bi wesîleya serrgêra Şorişê Rojawanî çalakîye pê deqayêkê rêzgirewtişî dest pêkerd. 

Hemserekê KCDK-E  Yuksel Koçî ke bi nameyê Komîteya Vera Peymana Lozanî qisey kerd,  waşt ke wa her kes vera tecrîdê Îmraliyî vengê xo vejo. Koçî dima bale ante ser ke Peymana Lozanî 23yê temmuze de 100 serranê xo temam kena û vist vîrî ke Peymana Lozanî bingeyê qirkerdişanê vera kurdan o. Koçî vat: ''Vindarnayîşê qirkerdişî pê wedaritişî tecrîdê Îmraliyî beno. Kurdî her ca de seba azadîya Rayber Apoyî xo ver danê û Peymana Lozanî qebul nêkenê. Coka ma do 22yê temmuze de Lozan de rayraşîyayîşêkê girseyîyî bikerê. Pêro kurdî ganî tewrê na çalakîye bibê.''