Sîyasetmedara kurde  û Hemsereka verêne ya DBPyî Sebahate Tuncela ke Zîndanê Kandira de tepişte ya seba wedaritişê tecrîdê vera Rayberê Şarê Kurdî Abdullah Ocalanî Wezaretê Edaletî rê waştişnameyêk nuşt.

Tuncele da zanayene ke tecrîdê Îmraliyî bîyo îşkenceyêko sîstematîk û waşt ke wa Abdullah ocalan keye û avûkatanê xo bivîno.

Waştişnameyê Tuncele bi kilmî wina yo:

''21 serrî yo Îmrali de huqûqêko taybet esto û îşkenceyêko sîstematîk esto. Birêz Abdullah Ocalan nêeşkeno avûkatan û keyeyê xo bivîno. CPTyî zî zîyaretê Îmraliyî ra dima waştbi ke îşkenceyê Îmraliyî wa bêro qedînayene. Hukmat herinda ke tecrîd wedarno kerd giranêr.

Nê prosesê pandemî de weşîya Birêz Ocalanî û embazanê ci ser o agahîyêke nêna girewtene. Medyaya komelkî de zî tay îdîayî weşanîyayî. Weşîya Birêz Ocalanî ra no hukmat mesuldar o. Ganî cade Birêz Ocalan û avûkatê ci pêvînayîş bikerê.

Wextê grevê vêşanîye yê 2018î de Wezîrê Edaletî Abdulhamît Gulî pare kerdbi ke verê pêvînayîşê Ocalanî de astengîye çin a û pêvînayîşî ra dima grevê vêşanîye qedîyabi. La dima tecrîd ame caardene. Coka tepişteyan newe ra dest pê grevê vêşanîye kerd. No grevo ke ez zî menga teşrîna peyêne de tewra ci bîya heta ke tecrîd biqedo do dewam bikero.''