Paytextê Brîtanya de vizêr  Sempozyumê Mîyanneteweyîyî yê Paştdayîşê Bi Tepişteyan ame kerdene. Beşê peyênî de avûkatanê Buroyê Huqûqî yê Asrinî ra Mazlûm Dînç, akademîsyen Jeffrey Miley, Temsîlkarê Komîteya Paştdayîşê bi Tepişteyanê Sîyasîyan ya Ewropa Suleyman Gurcan û Temsîlkarê Platformê Vengê Teppişteyan (TSP) ê Ewropa Bakî Selçuk amade bîyî.

Mazlûm Dînçî destpêkê beşî de qisey kerd û ard ziwan ke Tirkîya de tepişteyê sîyasî raştê teda û îşkenceyanê giranan yenê. Dînçî sîstemê Îmraliyî ercna û pare kerd ke 38 mengî yo Rayberê Şarê Kurdî Abdullah Ocalanî ra xeberêke nêna girewtene. Dînçî vat: ''Îmrali de huqûqo neteweyî û mîyanneteweyî nêno caardene. Sîstemê Îmraliyî rûmetê merdimatîye ra dûrî yo. Rixmo ke ma tim muracatê CPT û Mehkemeya Heqanê Merdiman a Ewropa kenê Tirkîya tecrîd de israr kena. 

Ganî vera tecrîdê Îmraliyî xetêka têkoşînî ya mîyanneteweyîye bêra awankerdene. Şiknayîşê tecrîdî do verê prosesê çareserîye abikero û Birêz Ocalan seba haştîye do rolê xo bîyarıo ca. Ganî ma vera tecrîdî têkoşînî xurtêr bikerê.''

Akademîsyenê Zanîngehê Cambridge Jefrrey Milleyî qalê manaya têkoşînê azadîya kurdan û tecrîdî kerd. Jeffreyî ard ziwan ke dewlete seba ke sîstemê xo meşrû bikera çekuya 'terorîst'î şuxilnena. 

Jeffreyî dîyar kerd ke Abdullah Ocalan teyna lîderê PKKyî nîyo; Rayberê Şarê Kurdî yo û vat: ''Sey Mandelayî Ocalan zî seba prosesê haştîye aktorêko girîng o. Paradîgmaya demokrasîyî ya Ocalanî seba merdimatîye girîng a. Seba destpêk û dewamkerdişê prosesê haştîye Abdullah Ocalan kesêko girîng o.''

Bakî Selçukî vat ke tecrîdê vera Abdullah Ocalanî wayîrê karakterêkê cîyayî yo. Selçukî qalê rewşa zîndananê Tirkîya zî kerd.

Suleyman Gurcanî îfade kerd ke heqê kurdî yenê krîmînalîzekerdene û qedexekerdene û vat: ''Tepişteyê sîyasîyî sey 'dişmenî' yenê mojnayene. Girîng o ke vera ney têkoşînêko hempar bêro kerdene.''