Sendîkaya Maliman a Almanya paştî daye xoverdayoxan

Dezgehanê cimatê sivîlan ê Almanya  ra Sendîkaya Perwerde û Zanistî (GEW) da pêhesnayene ke ê paştî danê çalakwananê ke semedê wedartişê tecrîdî grevê vêşanîye de yê.

Grevê vêşanîye yo ke rayberîya Leyla Guvene de semedê wedartişê tecrîdê serê Rayberê Şarê Kurdî Abdullah Ocalanî, zîndanan û xeylî cayanê dinya de dewam keno, rê hukmat hema  bêveng o. Hetê bînî ra paştdayîşê dezgehanê cimatê sivîlî dewam keno.

Almanya de Sendîkaya Perwerde û Zanistî (GEW) bi eşkerayîya nuştekîye da pêhesnayene ke ê paştî danê çalakwananê ke semedê wedartişê tecrîdî grevê vêşanîye de yê. Eşkerayîya ke ripelê înternetî yê sendîka de ca gêna de bale ancîya qewimîyayîşanê Tirkîya û Sûrîye sere û seba ke newe ra pêvînayîşê haştîye bêrê kerdene veng dîya. Dewamê eşkerayîye de grevê vêşanîye ame silamkerdene û ame vatene ke waştişê çalakwanan biheq ê û ganî bêrê bicaardene. GEW’î semedê domanan ê ke rîyê şerî ra perwerde  caverdayo zî veng da û vat ke ê paştî danê mekteb û universîteyê ke Rojawan û Sûrîye de yenê înşakerdene. GEW’î waşt ke semedê pawitişê şaran rotişê tifingan biqedîyo û herême  firdayîşî rê bêro qedexekerdene.

Sendîkaya Perwerde û Zanistî (GEW) ya ke merkezê ci Frankfurt de yo sendîkayanê girdan ê Almanya  ra yew a. Nizdê 300 hezar endamê ci estî û seranserê welatî de birêxistin a.