Mahmûd Hasan şi serdana keyeyê Hemsereka KCD'yî Leyla Guven a ke 170 rojî yo vera tecrîdkerdişê Rayberê Şarê Kurdî Abdullah Ocalanî grevê vêşanîye de ya. Hasan serdane ra dima eşkerayîye daye çapemenîye.

Serdana Hasanî dimayê serdana endama Polîtburo ya Cepheyê Xelasî yê Şarî yê Filîstînî Leyla Xalîde ameye viraştene. Xalîde hewteyê vîyarteyî de, silamê Sekreterê Pêroyî yê Cepheyê Xelasî yê Şarî yê Filîstînî Ahmed Saadetî Guvene rê ardibi.

Hasanî eşkerayîya xo de seba Guvene vat, “Cinîyêka xeylî bihêz û xurt a”

Hasanî ard ziwan, çalakîya grevê vêşanîye ya Guvene seba haştîye ya û vat, “Waştişanê bingeyênan ê  Guvene ra yew zî, wedaritişê tecrîdkerdişê Ocalanî yo. Tecrîd cezayêk tewr giran o. Nêbeno ke tu kesî bi nê hawayêkî demdergî bêro tecrîdkerdene. Tewr cayêkê dinya de cazayêka bi nê hewayî qanûnan de çin a.”

Hasanî ard ziwan, ê bawer kenê ke grevê vêşanîye yê Guvene do ser bikewo û vat, “Têkoşîn do ser bikewo û tecrîd bêro wedaritene.”

Hasanî da zanayene ke nika Fîlîstîn de zî rewşêka sey Kurdan yena ciwîyayene û vat, “Uca de zî mahkemeyê eskerî yê dewleta Îsraîlî estê.  Nê mahkemeyan de zî hemwelatijê Fîlîstînî yenê girewtene û bi tecrîd yenê cezakerdene.”

400 Fîlîstînijî hepisxaneyanê Îsraîlî de seba şermezarkerdişê binpankerdişê heqanê merdiman destpêkê menga Nîsane de kewtibî grevê vêşanîye yê bêdemî. Sekreterê Pêroyî yê Cepheyê Xelasî yê Şarî yê Filîstînî Saadet zî tewrê grevê vêşanîye bibî.