Bajarê Strasbourgî yê Fransa de grevê vêşanîye yê hemverê tecrîdkerdişê Rayberê Şarê Kurdî Abdullah Ocalanî yo ke 17’ê Kanûn a 2018’î de dest pêkerdibi kewt roja 122’ine.

Pîya bi Kurdanê ewropa xeylî kesê çepgêr, sosyalîst, demokrat û temsîlkarê sazîyan şinê serdana xoverdayoxan û paştî danê waştişanê înan. Pîya bi îdareyê ATÎK’î, hemsereka Federasyonê Cimatê Kurdistanî yê Bayern Banner Lutenbergî Fîlîz Çakallike vizêr şîye serdana çalakwanan.

Çakallike wextê serdane de peyam da û vat ke çalakîyê hemverê tecrîdî çalakîyê xokrîtîkkerdişî yê û ard ziwan ke çalakîyê ke Ewropa de yê rastîya xoverdayîşê Kurdistanî veta meydan, loma xeylî muhîm ê.

Vervatoxê Organîzebîyayîşê Şorişgêr ê Demokratî ê Stuttgartî û endamê ATÎK’î Îsmaîl Saricayî zî vat ke karakter û polîtîkaya faşiste ya dewleta Tirkî ya hemverê Kurdan û bindestan dewam kena.

Îsmaîl Saricayî da zanayene ke faşîzm û xayînî bi hêrişê hemverê şarê Kurdî kenê ke netîce bifînê dest û vat heme şorişgêr, demokrat û çepgêrî do paştî bidê şarê Kurdî.

Saricayî heman wextî de bale ante serê tecrîdkerdişê Ocalanî û vat no çi rey nêno qebûlkerdene û bale ante serê muhîmîya xoverdayîşî.

Mîyanê roje de parlamentera serrewextê verê nikayî yê HDP’yî ya Wanî Tûgba Hezere û parlamentera Amedî Nûrsel Aydogane şîyî serdana çalakwanan.