Hemveravtoxê Komîsyonê Zîndanan ê OHDyî yê Anqara Çîgdeme Kozan derheqê binpaykerdişê heqanê tepişteyan de ANFyî rê qisey kerd.

Kozane dîyar kerd ke vêşnayîşê înfazan yan zî veradîyayîşê tepişteyan rojdemê keyeyan o û vat: ''Tepişteyê ke înfazê înan qedîyayo, vera nêdîyenê. Bi bahaneyan cezayê dîsîplînî dîyenê tepişteyan.  Mîsal Zîndanê Sîncanî de seba ke cinîyan deyîre vate û govende girewte cezaya dîsîplînî dîyaya înan. Bi biranê Heyetê Çimdarîye û Îdareyî înfazî yenê vêşnayene. Heyetê Çimdarîye û Îdareyî xo sey mehkeme hesibneno û derheqê azadîya kesan de biran dano. Dewlete tepişteyanê sîyasîyan rê vana ke azadîya înan têna destê mehkeme de nê destê îdareyê zîndanî de ya zî. Tepişteyanê sîyasîyan rê poşmanîye yena ferzkerdene. Dewlete vêşnayîşê înfazî zî kerdo metodêkê teda. Dewlete destûr nêdana ke tepişteyî heqanê xo bişuxilnê.''

Kozane bale ante mergê zîndanan ser û vat: ''Derheqê nê mergan de tehqîqatêko hîra nêno kerdene. Îdareyê Zîndanî vano Ferhan Yilmazî xo kişto la bedenê ci de rêçê îşkenceyî est ê. Şertê zîndanî û kerdişê wezîfedaranê zîndanî psîkolojîya tepişteyan xeripnenê. Bi nê hawayî mergê zîndanî yenê mîyankerdene. Rewşa tepişteyanê nêweşan zî asta krîtîke de ya. Dezgehê Tipê Edlîyî pê raporanê xo nêverdeno tepişteyan zîndanî ra vejîyê. Aysele Tugluk rê Nêweşxaneyê Dezgehê Tipê Edlîyî raporê 'eşkena zîndan de bimana' dayo. Dezgehê Tipê Edlîyî goreyê zanist û etîkî nê goreyê konjukturê sîyasîyî têgêreno. 

Ganî vera tepişteyan huqûqê dişmenîye bêro wedaritene. Eke tecrîd nêro kerdene û heqê tepişteyan nêrê binpaykerdene, meseleyê tepişteyan zî hînî çareser benê.''