Sereka Komîsyonê Hemwelatijanê Tirkîya yê Yewîya Ewropa (EUTCC) Prof. Kariane Westrheime derheqê çalakîyanê grevê vêşanîye yê seba qedînayîşê tecrîdê serê Rayberê Şarê Kurdî Abdullah Ocalanî yenê viraştene, selahîyetdaranê Ofîsa Sekreterîya Pêroyîye ya Konseya Ewropa (KE) dir pêvînayîş kerd.

Pêvînayîş vizêr virazîya û endama EUTCC Dr. Dersim Dagdevîrene û temsîlkarê HDP’yî yê Konseya Ewropa Fayîk Yagizay zî tewrê ci bi. Pêvînayîş de bi waştişê xoverdayoxanê grevê vêşanîye û halê înan ê weşîye dosyayêk amî pêşkêşkerdene.

Sereka EUTCC’yî Prof. Kariane Westrheime pêvînayîşî ra dima eşkerayîyêk daye û ard ziwan ke pêvînayîş de înan halê çalakwananê xoverdayîşê grevê vêşanîye ercnayo û derheqê halê weşîye yê çalakwanan de hayîdarîyî resnayê Konseya Ewropa.

Rayîrê Çareserî yo Tekane Qedînayîşê Tecrîdî yo

Prof. Kariane Westrheime da zanayene ke ê paştî danê waştişanê çalakwanan û vat ke înan selahîyetdaranê Ofîsa Sekreterîya Pêroyîye ya Konseya Ewropa ra waşto ke seba qedînayîşê tecrîdî zor bidê Tirkîya. Westrheime vat ke înan pêvînayîş de bale anta seba ke çîyêk bi kesêk nêbo rayîro tekane yê çareserîye qedînayîşê tecrîdî yo.

Westrheime ard ziwan înan selahîyetdaran ra vato ke zîndanan de nika 7 hezarî tepişteyî grevê vêşanîye de yê û bale anta ke tekane keso ke bieşko grevanê vêşanîye rê peynî bîyaro Rayberê Şarê Kurdî Abdullah Ocalan o. Westrheime veng da ke waştişanê merdimîyan ê çalakwanan rê cewab bêro dayene û problemê Kurdan zî bi teşebusanê dîplomatîkan bêro çareserkerdene.

Prof. Kariane Westrheime da zanayene ke selahîyetdaranê Ofîsa Sekreterîya Pêroyîye ya Konseya Ewropa înan ra vato ke înan dewleta Tirkîya reyde pêvînayîşê dîplomatîkî kerde û seba çareserkerdişê problemî pêvînayîşê înan dewam kenê.