Serra 2021î de esaretê Rayberê Şarê Kurdî Abdullah Ocalanî kewt serra 22. Hetê bînî ra xoverdayîşê Rayberê Şarê Kurdî yo ke 15ê sibata 1999î de bi Komployê Mîyanneteweyî amebi remnayene û esîrkerdene vera rejîmê îşkence û tecrîdî 22 serrî xo pey de verdayî. Zîndanê Îmraliyî de îqtîdarê AKP-MHPyî serra 2021î de tecrîd, îzolasyon û 'mergo hêdî hêdî' giranêr kerd. Babeta cuye, weşîye û azadîya Rayberê Şarê Kurdî rojdemê Kurdîstanî û şaranê bînan ra nêşîye.

Nêrazîbîyayîşê zêdeyî yê rayaumûmîya Kurdîstanî û dinya ra dima Mehmet Ocalanî birayê xo Rayberê Şarê Kurdî Abdullah Ocalanî reyde 25ê adara 2021î de pêvînayîşêko kilm kerd ke 324 rojî bi tira xebere nêameyêne girewtene. Abdullah Ocalano ke tewr peyên 27ê nîsana 2020î de bi telefonî birayê xo de qisey kerdbi vatbi ''Pêvînayîşêko winasên zaf şaş û tehlukeyîn o. Eke pêvînayîşêk do bibo ganî avûkatî tede bibê.'' Ey pê nêvateyanê xo morê xo da binê serre.

Mehmet Ocalanî vat ke keso ke xo sey Mudirê Zîndanê Îmraliyî da şinasnayene 24ê adare de gêrîyayo ey. Mehmet Ocalanî vat: ''Ey vat ke ganî 25ê adare de saete 13.45 de ez Serdozgerîya Komare ya Riha de biba ke bi telefonî kekê xo de qisey bikera.''

Mehmet Ocalanî pare kerd ke serê sibayî o şi Edlîyeya Riha û hayîya selahîyetdaran pê qiseykerdişê telefonî estbîye û 10 deqayan ra dima o têna ameyo berdene bi odayêka qata cerine. Mehmet Ocalanî ard ziwan ke oda de xebatkarêk esto û o do a oda de kekê xo reyde qisey bikero. Mehmet Ocalanî da zanayene ke wexto ke telefon cêna, ey cewab da û Rayberê Şarê Kurdî pêser tira vato ''Ti senî ameyî tîya? Kamî ti ard? Se bî? Ti ça ra telefon kenî?''

Mehmet Ocalanî wina dewam kerd: ''Kekê mi va 'Hem ti hem zî dewlete şaşîye kenê. Sebeb zî no yo, serrêke ra nata qet pêvînayîş çin o. No huqûqê dewlete de yan zî huqûqêkê bînî de çin o. Ameyîşê to raşt nîyo. dewlete zî çîyê raştî nêkena. Eke pêvînayîşêk bibo ganî çarçewa huqûqî de bibo. Nêbeno ke serrêke ra pey pê telefonî pêvînayîş bêro kerdene. Dewlete bi şaşîtî têgêrena. Gelo hayîya înan esta ke ha se kena? No nêno qebulkerdene. Ez wazena avûkatanê xo reyde pêvînayîşî bikera. 22 serrî yo ez ha tîya de ya. Na mesele key safî bena?''

Mehmet Ocalanî îfade kerd ke ey Rayberê Şarê Kurdî rê vato ke sebebanê pêvînayîşî ra yew zî grevê vêşanîye yê zîndanan o û wina dewam kerd: ''Serekî vat 'Ez nêwazena çew seba mi grevê vêşanîye û zîndanan de bimiro. Mi verî zî wina vat. No çîyêko zaf giran o. Ganî şima zî ney bivînê.' Ma nêzdîyê 4-5 deqayan qisey kerd. Serekî mi rê vat 'No pêvînayîş raşt nîyo. No pêvînayîş zî nîyo.' Dima telefon birîya.''

Dewleta tirke cewabêko pozîtîf nêda waştişê wedarîyayîşê tecrîdî yê kurdan û 2021 de di reyî cezaya dîsîplînî daye Rayberê Şarê Kurdî. Avûkatanê Buroyê Huqûqî yê Asrinî nê rojan de bi muracat û eşkerayîyan waştêne ke xo biresnê Îmraliyî la ê musayî ke 29ê çeleyê 2021î de cezaya dîsîplînî dîyaye Rayberê Şarê Kurdî.

Hayîya rayaumûmîye 29ê teşrîna peyêne de pê cezaya dîsîplînî ya diyîne bîya. Avûkatanê Buroyê Huqûqî yê Asrinî 22ê teşrîna peyêne de bi waştişê pêvînayîşê lezabezî muracatê Mehkemeya Înfazî ya Bursa kerd. Buroyî ard ziwan ke 8 mengî yo muwekîlan ra xebera înan çin a. Mehkeme muracat red kerd û qedexeyê pêvînayîşî yê 6 mengan sey bahane mojna. Mehkeme waştişê pêvînayîşî yê keyeyan zî bi bahaneya 'bêparverdayîşê heqê qebulkerdişê zîyaretkeran' red kerd. La derheqê tehqîqat û cezaya dîsîplînî de qet yew agahîye nêdaye.

Qedexeyê 'Volta'

Avûkatanê Buroyê Huqûqî yê Asrinî ra Rêzan Sarica derheqê cezayanê vera Rayberê Şarê Kurdî de wina vat: ''Wazenê ceza binimnê.Seba ke Birêz Ocalanî volta eşta ceza dîyaye ci. Ey îtîrazê ney kerdo zî. Heqê volta heqo global o. No zî mojneno ke nê cezayî bi hawayêkê keyfî dîyenê.''

Teşrîna verêne de eşkera bi ke verî zî bi bahaneya 'volta' cezaya dîsîplînî dîyaya Rayberê Şarê Kurdî. Bi bahaneya ke 'xebatanê sporî keno komel' Serekîya Destûrê Dîsîplînî ya Zîndanî 14ê êlula 2018î de cezaya '3 mengan zîyaretkeran nêeşkeno qebul bikero' daye ey û rayaumûmîya kurdan 29ê teşrîna verêne ya 2021î de na ceza ra hayîdar bîye.

Mehkemeya Destûrê Berzî zî paştî daye îşkence û tecrîdî

Avûkatanê Buroyê Asrinî waşt ke bira heyetê dîsîplînî, dosyayanê ceza bêrê dayene înan coka avûkatan 2020 de muracatê Mehkemeya Înfazî ya Bursa û Mehkemeya Cezaya Girane kerd. Waştişê avûkatan verî hetê Mehkemeya Înfazî ra dima zî hetê bira Mehkemeya Cezaya Girane ra ame redkerdene. Avûkatan seba muwekîlanê xo Veysî Aktaş û Hamîlî Yildirimî menga teşrîna peyêne de muracatê Mehkemeya Înfazî kerd ke keyeyî bieşkê pêvînayîş bikerê. La muracat ame redkerdene. Avûkatan naye ser o seba Konar, Aktaş û Yildirimî muracatê Mehkemeya Destûrê Berzî kerd.

Mehkemeya Destûrê Berzî 13ê adara 2021î de bire daye û muracat sey 'nêno qebulkerdene' pênase kerd û bire daye. Mehkeme bire daye ke qet yew binpaykerdişê heqî çin o. Mehkeme bi nê hawayî canêameyîşê pêvînayîşî, xonêresnayîşê biranê muwekîlan 'dûştê huqûqî' nêdî.

Avûkatan 165 reyî, keyeyan 53 reyî muracat kerd

Avûkatanê Buroyê Huqûqî yê Asrinî 2021 de 165, keyeyan 54 reyî seba pêvînayîşî muracat kerd la cewab nêdîya înan. Rayberê Şarê Kurdî Abdullah Ocalanî tewr peyên 7ê tebaxa 2019î de avûkatê xo dîyî û reya verêne û peyêne 27ê nîsana 2020î de heqê xo yê pêvînayîşê telefonî şuxilna.

Rojanê peyênan ê serre de HDPyî vera tecrîdî kampanyayêke daye destpêkerdene. HDPyî netîcenameyê Meclîsê Partîye yê 10ê çeleyî eşkera kerd. HDPyî bi nê vengdayîşî kampanya îlan kerde:

''Seke wezîfeyê ma yo lez ame ercnayene ke seba ke waştişê wedarîyayîşê tecrîdî yê vera Birêz Ocalanî yê tepişteyanê grevê vêşanîye û qedîyayîşê binpaykerdişanê heqanê bêrê caardene ganî hîsgerîya demokratîke ya xurte bêra awankerdene. Ganî ma eşkera bikerê ke têkoşînê vera tecrîdî û têkoşînê seba çareserîya demokratîke û hêvîya haştîye têna rojdemê ma yê tewr girîngî nîyê rojdemê pêro komelî û hêzanê demokrasî yê.''

Wekîlanê HDPyî Kemal Bulbul, Huseyîn Kaçmaz, Abdullah Koç, Celadet Gaydali, Şevîn Çoşkun, Feleknas Uca, Kemal Pekoz, Omer Faruk Gergerlîogl, Erol Katircioglu û Gulîstan Koçyîgît z'i 15ê çeleyê 2021î de seba ke tecrîd wedarîyo eşkerayîya çapemenîye daye. Wekîlan venga her kesî da ke bi hîsgerî nêzdîyê waştişê tepişteyanê grevê vêşanîye bibo. Menga peyêne ya serre de zî keyeyanê Hayrî Knar, Hamilî Yildirim û Veysî Aktaşî veng da. Kombîyayîşê 1ê kanûne de Wekîlê HDPyî Omer Ocalan,  waya Omer Hayrî Konar Emîne Konar, waya Veysî Aktaş Sabîha Aktaş û avûkatê Buroyê Asrinî Ozgur Faîk Erol û Serbay Koklu amade bîyî.

Kurdîstan û Tirkîya de tewiro xurtêr vejîya werte

Gulane 768 avûkatan û huqûqnasan kampanyaya îmzayan daye destpêkerdene. Înan waşt ke avûkatî wa bieşkê Ocalanî bivînê. Kampanya de OHDyî îlan da Yenî Yaşamî û waşt ke Abdullah Ocalan wa cade avûkatanê xo bivîno. Hemserekê verênî yê HDPyî Selahattîn Demîrtaşî, Hemsereka ÎHDyî Erene Keskîn û avûkat Ercan Kanarî zî îmza daye kampanya.

Yewîya Avûkatan a Herêma Cizîre ya Rojawanê Kurdîstanî zî venga her kesî da ke bi hawayêkê aktîfî vera tecrîdî têbigêro û da zanayene ke ê xo sey avûkatanê Ocalanî hesibnenê. Vakurê Kurdîstanî de 344 rêxistinanê komelê sivîlî binê sîwana Platformê Demokrasî yê Herême de eşkerayîya hempare daye û waşt ke tecrîdê Îmraliyî wedarîyo.

Platformê Demokrasî yê Herême21ê sibate de verê peykerê Heqanê Merdiman ê Parka Koşuyoluyî de ame yewca. La polîsan dormeyê peykerî girewt û nêverda ke eşkerayîye bêra dayene. Endamanê platformî waşt debikewê parke la polîsan dormeyê parke zî girewt. Platformî dima Cemîyetê Rojnamegeran ê Rojhelatê Başûrî (GGÇ) de eşkerayîye daye.

Rêxistinanê demokratîkan heman rojan de Anqara de eşkerayîye daye û waşt tecrîd bêro wedaritene.

4ê nîsane de Amara hetê polîsan ra gêrîyaye binê ablûqa

4ê nîsane rojbîyayîşê 72. yê Rayberê Şarê Kurdî Abdullah Ocalanî ra verî polîs û leşkeranê tirkan dormeyê dewa Amara ya qezaya Xelfetî ya Riha girewt ke Ocalan tede dadîya xo ra bibi. Rixmê astengîyan zî girseyî uca de seba fîrazkerdişê rojbîyayîşê Ocalanî kewtî rayîr. Wesayîtanê zirxînan rayîrê Amara girewtî. 4ê nîsane de KCD, TJA, BDP û HDPyî waşt şorê Amara. La leşker û polîsan nêverda.

Têna rojbîyayîşê Ocalanî nê pêro rêçê ke ey verdayê dewleta tirke tersnenê. Rayberê Şarê Kurdî serra 1979î de dima ke Vakurê Kurdîstanî ra derbazê Rojawanî bibîyêne wextêk dewa Elpelorî ya Kobanê de mendbî. 16ê nîsane de dewleta tirke hêrişê ê keyeyî kerd. Dewleta tirke pê droneyan hêriş kerd. Hêriş de zerarêko pîl resa keyeyî.