Çarçewa Kampanyaya ''Wextê Azadîye'' de Sêrte de hetê KCD, TJA, DBP û HDPyî ra têhetameyîşê şarî ame kerdene. Têhetameyîşo ke verê banê HDPyî de ame kerdene, Hemsereka Pêroyî ya DBPyî Salîha Aydenîz û Hemsrekê Pêroyî yê HDPyî Mîthat Sancar xeylêk wekîlê HDPyî aktîvîstê TJA, endamê Meclîsê Dayîkanê Haştîye  û bi hezaran kesî tewrê ci bîyî.

 Têhetameyîş de verî Salîha Aydenîz qisey kerd. Aydenîze bale ante tecrîdê serê Rayberê Şarê Kurdî Abdullah Ocalanî ser û nê vatî: ''Şarê Botanî ewro reyna tîya pê ruhê xoverdayîşî xo ramojna. Semedê haştîya bianore û komelêkê azadî ganî cade Abdullah Ocalan bêro veradayene. Tirkîya ewro xo pê huqûqî heme dinya de rezîl kerdo. Huqûqê xo binpay kena û tecrîd kena. Şarê kurdî semedê azadkerdişê ziwan û estbîyayîşê xo têkoşîn keno. Şarî kurdî zûrana nêxapîyeno. Nê şarî Newroze de vat muxatap Abdullah Ocalan o. Waştişê şarî ganî bêro caardene.''

Aydenîze hêrişê vera Şingalî zî şermezar kerd û vat: ''Polîtîkaya înan ê qirkerdişî seserran o ke esta. Coka Şingal de qirkerdiş kerd. Ma nê hêrişî şermezar kenê. Ganî statuyê Şingalî bêro naskerdene. Ne hukmatê Iraqî ne zî îdareyê Başûrî şarê Şingalî nêpaweno. Nê hêrişî ra hukmatê Iraqî zî berpirsîyar o. Şarê Şingalî rixmê fermanan çirey peyser game nêeşte do meerzo. Kurdî hêrişê ke ci rê benê xo vîr a nêkenê. Vera plananê leyminan ê dewletanê kapîtalîstan kurdî her ca de xover danê. No şar koletîye qebul nêkeno coka tim semedê azadîye kuçeyan de yo. Destkewteyo tewr pîl ê kurdan do azadîya Abdullah Ocalanî bo. Coka roje roja destfînayîşê azadîya Ocalanî ya.''

Mîthat Sancar zî vat problemê ke şarê Sêrtî anceno bale ante înan ser û vat: ''Sêrt de problemo tewr pîl bêkarîye ya. Şar feqîr o, xoza yena talankerdene. Netîceya polîtîkayanê talan û rantî yê îqtîdarî de şar tengayî anceno. Îqtîdar çimeyan semedê şarî nê semedê qesre şuxulneno  û sermayeyî  paştgeranê xo û şerî rê xerc keno. Coka şar bêkar û bênan o. La vêşanîye û feqîrîya şarê xeymê înan  de nêyo. Pê HESan xozaya Sêrtî talan kerde. Ma do nayî rê çare bivînê, şima do çare bivînê. Ma do pêro pîya nê îqtîdarî bibedilnê.''

Sancarî hêrişê vera partîya ci zî vistî vîrî û vat: ''Ê se kenê wa bikerê do ser nêkewê. Rixmê heme hêrişan destbenkerdiş, tepiştiş û qirkerdişan HDP payra yo û do çirey verê înan de milê xo çewt nêkero. Cewabê hêrişan şima danê. Xora coka HDP şar o. Seba ke şar o milê çewt nêkeno. Waştişê ma oyo ke  ma nê îqtîdarî bibedilnê la no têna qîm nêkeno. No welatî rê feyde nêkeno. Ganî sîstem bêro bedilnayene. Ganî zîhnîyetê talankerdişê xoza û qirkerdişê merdiman bêro bedilnayene. No sîstemo xeripnaye ganî bêro bedilnayene û polîtîkayê şerî bêrê çînkerdene. Pê çareserîya meseleya kurdî cuya mabênê şaran eşkena bêro înşakerdene. Heta ke meseleya kurdî çareser nêbo, tiway nêbedilyeno. Komel haştîye wazeno. Ma do pê hêzê ke şima ra genê, nê waştişê komelî bîyarî ca.''