Serkêşîya Kongreya Komelê Demokratîkî (KCD), Partîya Herêmanê Demokratîkan (DBP) de seba ke bale biancîyo hêrişanê PDKyî yê Başûrê Kurdîstanî ser, bajarekê Tiqebînî yê Silopîyaya Şirnexî de rayraşîyayîş ame kerdene.

Hemserekê Pêroyî yê KCDyî Berdan Ozturk, Hemserekê Pêroyî yê DBPyî Keskin Bayindir û Saliha Aydeniz, wekîlê Partîya Çep a Keske, Têgêrayîşê Cinîyan ê Azadan (TJA), Meclîsê Mayanê Haştîye, komeleyê paştdayîşê keyeyanê tepişteyan û kesanê ke merdimê xo vînî kerdî yê MED-TUHADFED, MEBYA-DERî, temsîlkarê partîyanê sîyasîyan û rêxistinanê komelê sîvîlî û şar tewrê ci bîyî.

Şaro ke bajaranê derûdorî ra ame, dekewtişê bajarekî de Kontrolê Agahîyanê Pêroyîyan (GBT) ra ame ravîyartene. Bi seyan kesanê ke pankarta "Em xiyanetê qebûl nakin, Em ê destkeftiyên xwe biparêzin" akerd bi slogana ''Wa bimiro îxanet'' ver bi Berê Sinorî yê Xebûrî rayra şi. Polîs û leşkeran bi mermîyanê plastîk, bombayanê gazî  û awa tazîkîne hêrişê şarî kerd. Xeylêk kesî birîndar bîyî. Hemserekê Pêroyî yê DBPyî Keskin Bayindiro ke birîndar bi wedarîya Nêweşxaneyê Dewlete yê Silopî.

Leşkeran kerd ke destê wekîlan ra pankarte bigêrê la Newroze Uysal destûr nêda ê pankartî bigêrê. Leşkerêkî Hemsereka Pêroyî ya DBPyî Salîha Aydeniz bi mergî tehdît kerd û kerd ke girmike bidê aye ro. Naye ser o mabênê Aydeniz û leşkeran de pêrodayîş vejîya. Leşkeran dima ra hêrişê şewirmendanê wekîlan kerd.

Salîha Aydenîz ard ziwan ke seba sînoranê sunîyan ê ke ameyî xezkerdene,  înan bikerê bêmana, ê ameyî Sillopîya û vat: ''La dewleta cade hêriş kerd. Nê hêrişî mojnenê ke ê 100 serrî yo senî hêrişê kurdan kenê. Vera nê hêrişan qet dadîyêke û hemwelatîyêkî peyser game nêeşte. Kurdan çirey vera hêrişan kuçeyî canêverdayî.  Ma ewro reyna dî ke dewlete senî nêzdîyê destkewteyanê kurdan bena la no şar do çirey peyser game meerzo. Dewlete bi hêrişî kena ke verê ma bîgêro ke ma vera PDKyî nêrazîbîyîş memojnê.

Ma tîya ra reyna veng danê ; nê hêrişî û hemkarîye semedê ameyoxê Kurdîstanî nîyê.  Nê hêrişî têna semedê menfeatê keyeyê Barzanîyî yê.  Eke yeno waştene ke destkewteyê kurdan bêrê pawitene, ganî mefeatê Kurdîstanî vernî de bêrê tepiştene û pawitene.  Ma pêrune dî ke Hakan Fîdan şi Başûr û hêrişan dest pêkerd.  Ma tîya ra reyna PDKyî hîşyar kenê. Tewirê dewleta tirke yê refarandûmê xoserîye, Efîn, Serekanîyê xo vîra mekerê. Prosesê Kobanê û Kurkukî de kurdî senî bîyî yew , ganî ewro zî wina bibê yew.

Ma tîya ra veng danê Mesûd Barzanî ke wa rol û mîsyonê xo bîyaro ca. Vatêne û birakujî nêwazeno. Nika rewşe meseleya birakujî zî nîya. No tewirêko yewhet ê PDKyî yo.''

Wextê qiseykerdişê Salîha Aydeniz de polîsan reyna bi gazê îsotî hêriş kerd. Badê hêrişî şar reyna taxayan de ame têhet.