Endamê Konseya Rayberdişî ya KCKyî Mustafa Karasuyî Medya Haber TVyî de rojdem ercna.

Qiseykerdişê Karasuyî ra tay noqtayê girîngî wina yê:

''25 serrî yo vera Rayber Apoyî tecrîd dewam keno. Tecrîd polîtîkayêka qirkerdişê kurdan a. Rayber Apo lîderê kurdan o. La vera ey bêhuqûqîye yena kerdene. A raşte Tirkîya de çimeyê pero neheqîyan û bêhuqûqîyan tecrîdê Îmraliyî yo. Heta ke tecrîd nêro wedaritene edalet nêno Tirkîya. Dewleta tirke seba ke nêwazena meseleya kurdan çareser biba Rayber Apoyî tecrîd kena. Tecrîdê vera Rayber Apoyî teyna kurdan ney pêro hêzanê demokrasî keno hedef. Coka ganî hêzê demokrasî vera tecrîdî vengê xo berz bikerê. Ê kesê ke huqûq û edaletî wazenê ganî tecrîdî teşhîr bikerê, vera tecrîdî têkoşîn bikerê.

Ez şexsê embaze Zîlane (Zeynepe Kinaci) de pêro şehîdanê menga Hezîrane bi rêzî yad kena. Çalakîya Zîlane ya fedayîye çalakîyêka sembole û tarîxîye bîye. Tewirê embaze Zîlane mojna ke Rayber Apo seba cinîyan ê kurdan û pêro şarê kurdî çend girîng o. Çalakîya embaze Zîlane bîye destpêkê xeylêk averşîyayîşan û artêşbîyayîşê cinîyan peyda kerd. Ganî ma xeta Zîlane de tim têkoşîn bikerê. Tewr peyêne ma xeta fedayîye tewirê şehîdanê Mêrdînî embaz Xebat Kop û Zana Rojdayî de dî. Xeta fedayîye û têkoşînê nê şarî do qetî bin nêkewê. Qeydê venganê embaz Zana û Xebatî tesîrê her kesî kerd. Nê qeydî mojnenê ke têkoşînê azadîye bîlasebeb nîyo.

Gerîlayan Xakurkê û Metîna de çalakîyê girîngî kerdî. Dişmen bêmabên hêriş keno la pê xoverdayîşê gerîlayan nêeşkeno. Gerîlayî zereyê tunelanê şerî de, serê erdî de bi fedakarî û qehremanî şer kenê. Xoverdayîşê gerîlayan bêguman do dewam bikero û çalakîyê înan do netîce bidê. La ganî ma çar parçeyanê Kurdîstanî de têkoşînê gerîlayan bikerê. Ganî şarê kurdî hîna bi xurtî tewrê têkoşînî bibo. 

Dewleta tirke dişmena pêro kurdan a û wazena kurdan qir bikera. La ma vînenê ke tay kurdê xayîn û hemkarî paştî danê dewleta tirke. Coka dewleta tirke hende bi giranî hêrişê kurdan û têgêrayîşê azadîye kena. Biewnê wexto ke Mesrûr Barzanî ame Tirkîya û Erdogan de pêvînayîş kerd hêrişê giranî ameyî kerdene. 

Kurdî ganî çar parçeyanê Kurdîstanî de bingeyê xopawitişî de xo rêxistin bikerê. Dişmen Başûr de hêrişê welatperweran keno, Rojawan de hêrişê cinîyan ê serkêşan keno. Şarê ma yê Başûr û Rojawanî ganî xurtî ra cewab bido nê hêrişan. Şarê ma yê Rojawanî ganî hîna bi xurtî tewrê têkoşînî bibo. Teyna pê YPG, YPJ û QSDyî nêbeno. 

Îqtîdarê AKP-MHPyî teyna qirkerdişê kurdan keno hedef û çareserîya meseleya kurdan asteng keno. Tay kesî vanê 'Kabîne de wezîrê kurdî zaf ê, îqtîdar nêzdîyê HUDA-PAR, PDKyî yo, nêzdîyê kurdan o.' Nê pêro polîtîkayê şerê taybetî yê. Îqtîdar keno ke kurdan bixapîno. AKP-MHP dînê Îslamî seba ke kurdan bixapîno şuxilneno. Ganî şarê ma raştîya nê îqtîdarî hol bizano û tira çîyêk nêpawo. 

HDP wayîrê yew felsefeya ronîyayîşî yo. Nika vera HDPyî rexneyê giranî est ê. Tay kesî wazenê ke HDP felsefeya xo ra yanî têkoşînê demokratîkbîyayîşî ra fek vera bido. No demagojî yo, polîtîkaya şerê taybetî ya. Wazenê ke wa HDP teyna bibo partîya kurdan. La no do kurdan rê fayde nêkero. Seba çareserkerdişê meseleyan xora HDP xo rê bigêro mutefîqan û hêzanê demokrasî reyde têbigêro. HDP seba kurdan bedelanê giranan dano. Têgêrayîşê kurdan o sîyasî 50 serrî yo têkoşînêkê pîlî dano. La seke HDPyî qet yew bedel nêdayo yan zî têkoşîn nêkerdo yeno rexnekerdene. No raşt nîyo.''