Soydan Akay 1983 ra nata bi sûcdarîya 'endamîya rêxistine' zîndan de tepişîyeno. Akay  ganî 11ê tebaxa 2023yî de vera bidîyêne bi bahaneyanê Heyetê Îdare û Çimdarîye ra vera nêdîyeno.

Akayo ke 2008 ra nata zî hucreyê yewkesî de tepişîyeno Heyetê Îdare û Çimdarîye derheqê ci de raporê 'rêxistina terorî ra anêbirîyayo' da.

Rapor de ame îdîakerdene ke Akay endamanê rêxistine yê tepişteyan de mîyanê têkilîyan de yo, kitabê bi tedeyîya tehlukeyîne wendê û derheqê wasîyê ci de zî endamîya rêxistine ra dewa ameya akerdene.

Avûkata Akayî Hemsereka OHDyî ya Îstanbulî Esra Bîlen û birazîya ci Kivilcime Akay derheqê babete de ANFyî rê qisey kerd.

Esra Bîlen ard ziwan ke heqê Akayî bi hawayêkê sîstematîkî yenê binpaykerdene û vat: ''Na rewşa vêşnayîşê înfazan yena sereyê xeylêk tepişteyanê sîyasîyan. Tepişteyî bi biranê mehkemeyan kewenê zîndanî la ancax bi biranê Heyetê Çimdarîye û Îdareyî eşkenê zîndanî ra vejîyê. Birê raporî yê heyetî goreyê huqûqî nîyê. Astengkerdişê tehlîyeya Akayî binpaykerdişê heqan o.''

Birazîya Akayî Kivilcime Akay pare kerd ke bi veranêdîyayîşî keyeyê Akayî zî yeno cezakerdene û vat: ''Nê kerdişî mojnenê ke huqûq nêmendo. Apê mi de xeylêk nêweşîyî est ê. Ma qaşo tebaxe de tehlîyeya ey pawitêne la ancî ma ameyî cezakerdene. Hewteyê peyênî de ancî ma ameyî cezakerdene. Ez domanîya xo ra nata mîyanê nê prosesan de ya. Mi rê giran o ke hema zî welat de çîyêk nêvurîyayo.''