Polîsanê dewleta Belçîka şaristanê Denderleeuwî de şewe bi hawayêkê barbarî eştbi bînaya Stêrk û Medya Haber TVyî û studyoyê wird kanalan zî serûbin kerdbî. 

Kedkaranê Stêrk TV û Medya Haber TVyî verê bînaya studyoyanê xo de eşkerayîyêke daye çapemenîye. 

Nameyê Stêrk TVyî ser o Ramazan Olçenî û nameyê Medya Haber TVyî ser o zî Hevale Arslan eşkerayîye wende.

Eşkerayîye wina ya:

''Polîsanê Belçîka 23ê nîsane de saete 01.30 de eşt bînaya şîrketanê Sterk N.V, Roj N.V. û Hivron N.Vyî ser. Derheqê hêrişî de qetî agahîyêke nêdîyaye avûkatanê ma. Polîsan şewe berî şikitî, bi hawayêkê korsanwarîyî eşt studyoyanê ma ser, dest na malzemeyanê ma ser û malzeme û materyalê ma zî texrîb kerdî. Ma nê hêrişê antîdemokratîkî, îlegalî û korsanî şermezar kenê. No hêriş vera vengê kurdan ame kerdene. Xora heman saete de Tirkîya de zî embazê ma yê rojnamegerî sereştişan de ameyî destbendkerdene. Balkêş o ke nê hêrişî serrgêra 126ine ya çapemenîya kurdan de ameyo kerdene.

Polîsanê Belçîka adara 2010î de zî eştbi heman studyoyanê ma ser. La o çax dewayê vera ma bênetîce qedîyabî. Şîrketê ma goreyê qanûnanê Belçîka xebitîyenê û qetî raştê cezayêke zî nêameyî.

No hêriş vera medyaya kurdan a azade û azadîya xebergirewtişî ya kurdan ame kerdene. Dewleta tirke û mutefîqanê ci heta nika hêrişê winayênî zaf kerdî û nînan ra netîceyêke zî nêgirewte. Ma sey kedkaranê çapemenî û medyaya azade tim karê xo kerd û do bikerê. Wa her kes bizano ke qet yew hêriş, teda û tepiştiş do pê ma nêeşko. 

Tede şik çin o ke no hêriş netîceya têkilîyanê rejîmê Erdoganî yê faşîstî de ameyo kerdene. Ma venga hukmatê Belçîka danê ke mabênê şima û Erdoganî de têkilîyêka senîne est a ke şima wina hêrişê kurdan kenê? Ma venga medyaya Belçîka, rêxistinanê komelê sivîlî û partîyanê sîyasîyan danê ke xebatê ma legal ê, studyoyê ma her kesî rê akerde yê û sere de polîsî her kes eşkeno bêro, xebatanê ma teqîb bikero. Ma çewî ra nimite çîyêkî zî nêkenê.

Polîsan bê avûkat û selahîyetdaranê ma eşt bînaya ma ser ke no zî mojneno ke no yew komplo yo. No kerdişê polîsan sûc û binpaykerdişê huqûqî yo. Ma do heqanê xo yê huqûqî bişuxilnê. Avûkatê ma do vera nê hêrişê korsanî cade têbigêrê.

Ma sey kedkaranê medyaya kurdan do tim bibê vengê şarê xo. Çew do nêeşko nê vengî bibirno. MA TÎYA DE YÊ. Mesuldarîyê ma yê ke ma şarê xo xeberdar bikerê. Ma do tim qelema xo bişuxilnê û bi kamerayanê xo raştîyan bigêrê. Rojnamegeranê Kurdîstanî hêrişê dewleta tirke, qetilkerdişê domanan, wehşetê DAÎŞî ûsn resna dinya. Dinya ney zanena. Ma do tim peyê raştî, holî û heqîqatî de bibê.''