Grevê vêşanîye yê ke rayberîya Leyla Guvene de semedê wedartişê tecrdîê serê Rayberê Şarê Kurdî Adullah Ocalanî yenî viraştene dewam kenî. Çalakîya Strasboûrgî ewro kewte roja xoya 70’ine. Çalakwanan veng da ke şar wa xoverdayîş hîna xurt biko.
PAŞTDAYÎŞÊ ŞARÎ RA MA HÊZ Û MORAL GÊNÊ
Bi nameyê çalakwanan Ramazan Îmîrî eşkerayîyêk daye û xoverdayîşê grevê vêşanîye ercna. Îmîrî derheqê çalakîya tarîxî de nê vatî: ‘‘Çalakîya ma sey roja verêne ewro roja 70. de zî bi qerardarîya pîle û moralo berz dewam kena. Nê demî de bi CPT û Konseya Ewropa (KE) vînayîşî ameyî kerdene. Hete Tîrkîya ra zî bixîle bi zî tayî gamî ameyî eştene. Lezabez Rayber Apoyî de vînayîş ame organîzekerdene û Leyla Guvene serbest ameye veradayene. Şarê zî zaf çalakîye rê wayîr vejîya û naye zaf moral da ma. Ewropa de şarê Kurdî lingan ser o. Roja ke bê çalakîyan ravêre çîn a.‘‘
HÊZÊ MÎYANNETEWEYÎYE TECRÎD RA BERPIRSÎYAR Ê
Îmîrî vist vîrî ke tecrîdê serê Rayberê Şarê Kurdî Abdullah Ocalanî de engişta hêzênê mîyanneteweyîye zî esta û wina dewam kerd: ‘‘Ewro Rojawan de paradîgmaya modernîteya demokratîke roşn dana dinyaye û sey çareserîya probleman yena zanayene. No serkewtişêko gird o. Uca paradîgma û felsefeya Rayber Apoyî serkewt a.vCoka Rayber Apo tim hedefê hêrişê hêzanê mîyanneteweyîye do. Tecrîd zî naye ra pabeste yo.‘‘
RÎYÊ BUTÇEYA ŞERÎ RA TIRKÎYA DE KRÎZ ESTO
Îmîrî bale ante ke tecrîd Tirkîya zî vista krîzî û vat ke dewleta Tirkî heme hêrişê vera Kurdan de bi xo vînî kena. Ewro Tirkîya de şar tengayî anceno. Krîzê sîyasî û komelkî û krîzê ekonnomî estî. Butçeya şerî ya ke şexsê Rayber Apo û vera Têgêrayîşê Azadîye, şarê Kurdistan û destkewteyanê Rojawanî yena şuxulnayene, Tirkîya fînena tengayî.
HEME DEWLETÎ DEYNDARÊ RAYBER APO‘YÎ YÊ
Îmîrî xoverdayîşê Kurdan ê vera çeteyanê DAÎŞ’î ard vîrî û va: ‘‘Ewro heme dinya Rayber Apoyî rê deyndar a. Xeyrê paradîgmaya Rayber Apoyî erwo dinya çeteyan ra xelisyaya. Ganî Ewropa zî berpisîyarîya xo bica bîyaro semedê wedartişê tecrîdî tê bigêro. Eke wazîfeya xo mero ca, siba verê tarîxî de do hesab bido. CPT vano ke ma dest ra çîyêk nîno. No vera ma, erjanê ma û vera xoverdayîşê ma yo tarîxî bê hûrmetîye ya û ma naye qebûl nêkenê. Wa CPT û dezgehê bînî hol bizanê ke hayî ma nînan esta. Ma tîfaqê nînan ê leyminan ra hayîdar ê. Vera tecrîd û îşkeceyî bêvêngmendiş teslîmîyet o û ma naye qebûl nêkenê. Bawerîya bihêz koyan cayê înan ra dana leqnayene. Ewro raştîya şarî ya ma ya ke Rojakewtena Mîyanêne cayê ci ra leqlenan esta. Ma bi bawerîye no xoverdayîşî danê domnayene. Xeyrê na bawerîya ma ewro DAÎŞ meydan ra ameyo wedartene. Ma ewro bi na bawerîya rayîrê xo rê dewam kenî. Ma tîya sey 14 kesî xover danê û wazenê ke layiqê ruhê 14’ê Temmuze bibê. Ma do rêça Kemal, Xeyrî û Mazlûman de ser bikewê.‘‘
GANÎ ÇALAKÎYÎ HÎNA BÊRÎ GIRDKERDENE
Ramazan Îmîrî semedê girdkerdişê çalakîyan veng da û eşkerayîye wina qedîna: ‘‘Şarê ma bi çalakîyan moralo gird dano ma. Ma naye ra hêz gênê. La hetêk ra şar meydanan de yo hetê bînî ra bêvêngîye esta. Bajarêk de çalakîyî estî bajarê bînî de veng çîn o. Wina nêbêno ganî her ca de de hemen wext de heman reaksîyon bêro dayene. Bitaybetî zî şarê Ewropa eşkeno hîna organîzkerde tê bigêro û xoverdayîş xurt bikero. Vakûrê Kurdistanî de zî eke bi ruhê şorişgêrî yo xoverdayox xebatê weçînitişî bêrê kerdene ma do ser bikewê.‘‘