Çalakîya vîrardişî ya  ke pêşkeşîya ci Alî Gulerî kerde rê  hemverfekê HDK-Ayî Demîr Çelîk, Parlementera HDPyî ya Mûşî Gulîstan r bîyî. Koçyîgîte, Prof. Dr. Îlhan Kizilhan, hunermendî Mîkaîl Aslan, Zerîfe Zerîn, Hozan Comerd û bi seyan kesî  beşdar bîyî.

Çalakîye de peykero ke seba vîrardîşê Seyît Rizayî ameybi viraştene, sehne de mocnîya. Zarîfe Zerîn û Dogan Demîr ê ke viraştişê peykerî de keda xo tede viyarto nê peyamî dayî:
Zerîn: “No proje rewna yo xeyalê mi bi û viraştişê ney bi embaz Doganî ya zaf bimana bi. Seyîd Rizayî ro wayîrvecîyayîş, Dêrsim û heme bindestan ro wayîrvecîyayîş o.”

Demîr: “Mi gureyê mermer û kemere kerdêne la na reye mi malzemayanê şuxulnayeyeyan ra viraşt. Viraştişê yew peykerî   eynîyê viraştişê yew merdimî/e  nîyo.  Ma ganî peykerê ke peyama ke ey wazeno bido, bivirazê. Rodemî seba ke yew peykerê Victor Hugoyî virazo, 20 ra vêşêrî versîyonî ceribnayê. No Ewropa de yew o la ma do heta ke yo  tewr rind vecîyo meydan dewam bikerê.
  
“ROJA ÎTÎRAZÎ, BÊVENGBÎYAYÎŞÎ NEY, ROJA SERREWEDARITIŞÎ YA!”

Hemsereka komela Verva Qirkerdişê Dêrsimî  Elîf Taşe zî  va ke “Ma sey kesê ke welatê xo ra dûrî cuyenê  ganî hîna hêzin û pîya bê” û hemverfekê HDK-Ayî  Demîr Çelîkî zî  wina va: “Şexsê Seyîd Rizayî de heme şehîdanê şorişî  bi rêz û hurmet bi vîr ana. Zihnîyetê netewedewlete yê seserra verî hema zî dewam keno. Netewedewleta ke dînperestîye û cinsîyetperestîye ser o awan bîya, hema mewcudîyetê xo domnena. Semedê Cinîya Sereke ya ke ercê exlaqî û polîtîkî afernayê, nê qetlîamî kerdê. Ewro seba  pawitişê nê ercan koyanê Kurdistanî de û  Rojawan de xortê ma yê ke bi distûra “yew parî û yew pîyaz“ lej kenê estê û ê hêvîyê ma yê.  Roje hendî roja îtîrazî, bêvengbîyayîşî nîya roje roja serrewedaritişî ya.”

Zarîfe Zeîna ke vecîyaye sehne ser o va: “Qirkerdişo ke Dêrsimî de bi ewro Cizîr, Sûr û Rojawan de dewam keno” û va ke “Çîyo esas  nînan cara xovîrra nêkerdiş o” û kilamê kirmanckî vatî.

Îlhan Kizilhan zî bado ke bale ante qirkerdişî ser vat “Nika zî ma welatê xo de benê şahidê nê qirkerdişî. Ma ganî bibê yew ke perçe perçe nêbê. Estişê Pîr Seyîd Rizayî  estişê ma yo.” Dima ra wina beyan kerd ke “cuynayîşê Seyîd Rizayî estişê ma yo kulturên o.”

Peyê coy Comerdî sehne de cayê xo girewt.

  
“MA GANÎ PÊHET DE Û HÎNA HÊZİN BÊ”
 
Parlementera HDPyî Gulîstan Koçyîgîte va ke “Ma sey Kurdî û Alewîyî  duştê nê welatî û bêhuquqîya ke ma tede yê vengê xo vecê. Şima şexsê Kurdan de se serran a ercê ke merdiman daye arê sey pereyê wirdî xerc kerdî. Ma ganî bieşkê vajê ke şima bi ercanê xo yê bingehênan û însanîyan pê nêkenê.” Ganî ma pêhet de bê û hîna hêzin bê.” Û va ke “Weçînayîşê 31ê Adare de eke CHP bibirre bo duştê AKPyî vecîyo ma eşkenê bêrê pêhet û ma do duştê AKPyî vecîyê”

Çalakîye bi goşdaritişê muzîkî yê Mîkaîl Aslanî qedîyaye. Peynîya çalakîye de  seba tewrbîyayîşê şewa destekdayîşê Efrînî ya ke 25ê  Teşrîna peyêne de organîze bena, veng dîya.