Paytextê Swêdî Stockholm de bi aktîvîteyêk qirkerdişê Mereş, Roboskî û 19ê Kanûne ameyî protestokerdene û êyê ke hetê çeteyan û dewleta Tirkî ra ameyî qetilkerdene ameyî vîrardene.

Federasyonê Yewîyanê Elewîyan ê Swêdî bi wesîleya serrgêra qikerdişanê Mereş, Roboskî û 19ê Kanûne aktîvîteyêk organîze kerde.

Hemsereka Federesyonê Elewîyan ê Swêdî Nevîn Kamîlogullari ya ke şewe de qisey kerd, vat ke qirkerdişê Elewîyan bi destê dewlete bi û wina dewam kerd: ‘‘19ê Kanûne de 34 tepişteyî bi destê dewlete bi vêşnayîşî ameyî qetilkerdene. 28ê Kanûne de 32 dewijê Roboskî yê ke zafê înan domanî bî, bi destê dewlete ameyî qetilkerdene. Ma nê qirkerdişan çirey xo vîra nêkenê. Seba ke vernîya qirkerdişanê neweyan bêro girewtene, ganî dewleta Tirkî hesabê nê qirkerdişan bido.‘‘

Qiseykerdişan ra dima derheqê qirkerdişan de belgefîlmî ameyî seyrkerdene. Bado zî Asli Yalcinoglu êyê ke qirkerdişan de ameyî qetilkerdene, bi deyîranê Kurdkî û Tirkî yad kerdî.