Mîlyon û nêm Armenî, Asûr, Suryan, Keldan û Rûm ê ke amayê qirkerdene Parlamentoyê Swêdî de bi merasîmêk ameyî vîrardene.

Rayberanê xeylî sazgehanê Armenîyan, Asûran, Suryanan, Keldanan û Rûman, parlamenterê xeylî partîyanê sîyasî û bi nameyê çalakwananê grevê vêşanîye yê Stockholmî hîrê kesî tewrê merasîmî bîyî. Hetkarîya Serekê Parlamentoyî Lotta Johnsson Fornarve ard ziwan ke no vîrardîş seba haştîye, demokrasî û têkilîya mîyanneteweyî muhîn o.

Kakabavehe: Qirkerdiş dimayê 1915  de zî dewam keno

Parlamentera Partîya Çepgire Amîneh Kakabavehe ard ziwan ke qirkerdişê Armenîyan bi destê împaratorîya Osmanîyan bado zî ame dewamkerdene û vat ke, “Serra 1938 de Dêrsim de 70 hezar Elewî ameyî qetilkerdene. Kamboçya, Srebrenîsta, Rûanda de qirkerdişî ameyî kerdene. Sedam Huseyînî vera Kurdan, DAÎŞ’î zî vera hezaran Êzidî û şaranê bînan qetilkerdişî kerdî.”

Zarakolû:  Tornê ci binê tehdîtê DAÎŞ’î de yê

Rojnameger û nuştox Ragip Zarakolûyî zî ard ziwan, seba ke derheqê Armenîyan û Kurdan de kitab nuşto, bado derheqê ci de dewayî ameyî akerdene û cezayî ci rê ameyî birnayene. Zarakolûyî da zanayene ke tornê Armenî, Asûr û Keldanîyan ê ke rîyê qirkerdişî ra verê xo dayo Iraq û Sûrîye nafa zî DAÎŞ’î ê qir kerdî. Zarakolûyî vat, “Tirkîya de  bi seyan serran bi rijnayîşê  abîdeyan  dêran no qirkerdiş ameyo dewamkerdene.”

Barjosef: Wa hukmatê Swêdî qirkerdişî nas bikero

Bi nameyê Komîteya Tûrabdîn a ke rêxistinanê Asûr, Suryan û Keldanan ameya pêardene Rebecka Barjosefe zî ard ziwan ke wa hukmatê Swêdî qerarê qirkerdişî yo ke înan serra 2010 de girewto, bîyarê ca.

Wexto ke parlementoyî de vîrardiş ame kerdene, Stockholm de zî  vernîya Temsîlkarîya Tirkîya de protestoyê nawnayîş ame viraştene.  Çalakwanî heta verê Meydanê Sergelî rayra şîyî.  Meydan de qirkerdiş ame  şermezarkerdene û vengdayîş bi Tirkîya ame kerdene ke wa polîtîkaya xo ya înkarkerdişî biqedêna û qirkerdişî qebûl bikera.