Swîsre de seba turê diyînî yê weçînayîşê serekkomarîye yê 28ê gulane 31 sindoqî ronîyayî û heta nika 61 hezar û 886 weçînitoxî rayî dayî.  Seba ke weçînitoxî bêrê raya xo bidê Koordînasyonê Weçînayîşî yê Partîya Çep a Keske û Federasyonê Yewîya Elewîyan ê Swîsre bêmabên xebitîyenê. 

Ciwan Şevger Turko ke nêweşîye ra nêeşkayo turê yewinî de raye bido venga pêro weçînitoxamê teberê welatî da ke wa bêrê raya xo bidê. Şevgerî vat: ''Hînî wextê ci ameyo ke Erdogan wa bêro binvistene. Ez venga pêro ciwanan dana ke wa qetî raya xo bidê. Seba ameyoxê welatê ma, domananê ma, welatêkê demokratîkî û azadîya kurdan ganî pêro ciwanî, sosyalîstî, şorişgêrî û beşê komelî bêrê sindoqan ser û raya xo bidê Kemal Kiliçdarogluyî.''

Muşahîda Partîya Çep a Keske Rabîa Baldemîr zî bale ante ser ke xeylêk kesî şinê sindoqan ser û vat: ''Ewro seba raydayîşî roja peyên a. Ma venga pêro cinî, ciwan, xizan, kedkar û her kesî danê ke wa bêrê raya xo bidê. Seba ke ma nê îqtîdarî ra hesab bipersê raya xo bidê. Rayêke zî zaf qîmetîn a û bi raydayîşî ma eşkenê nê îqtîdarî bin bivisnê. Ewro heta 22.00 wa her kes bêro sindoqan ser û raya xo bido.''