Merdimanê tepişteyan Nobeta Edaletî Meydanê Bagcilarî yê Îstanbulî de kerd. Wekîla HDPyî ya îstanbulî Dilşad Cabaz û endamê Meclîsê Dayîkanê Haştîye Zeynep Çalihan û Gulere Bugday tewrê çalakîya nê hewteyî bîyî.

Merdimanê tepişteyan waşt ver bi meydanê şirê û eşkerayîye bidê la polîsan destûr nêda. Naye ser o merdima tepişteyan Fince Akman nêrazîbîyayîş mojna. Akmane vat: ‘’Domanê ma zîndanan de mirenî. Ma nêwazenê wa hinî çew bimiro. Coka ma ameyî tîya. Ma edalet wazenê.’’ Endama Meclîsê Dayîkanê Haştîye Zeynepe Çalihan zî vat: ‘’Ma heq, huqûq wazenê. Hinî bes o. Wa domanê ma memirê.’’

Polîsan hêrişê şarî kerd. Merdime tepişteyan zî tede 7 kesî bi derbkerdişî û peykî kelemçekerdişî destbend kerdî. Merdimê tepişteyan Fince Akman, Cemile Karakaş, Cemile Çiftçi, Kumri Akgul, Hemsereka HDPyî ya Kuçukçekmece Gulsume Ozturk û endamê Meclîsê Dayîkanê Haştîye Zeynep Çalihan û Gulere Bugday ameyî destbendkerdene. Merdimê tepişteyan bi slogananê  “Bijî Berxwedana zindana”  û tîlîlîyan cewab da.

Reyna muxabîra Jinnewsî Marta Sokme û rojnamegerê bînî raştê hêrişê polîsan ameyî. Wekîle Dilşade Canbaz vera hêrişê polîsan nêrazîbîyayîş mojna û vat: ‘’Dayîkê têna wazenê ke wa hinî zîndanan ra cenazeyî mevejê, raştê hêrişî yenê. Dayîkê heştay serreyî pê şîdetî ameyî destbenkderdene. Zîndanan de îşkence es to, tepişteyê nêweşî est ê. Ma do rixmê heme hêrişan bêveng memanê û têkoşîn bikerê.’’