Aktîvîsta TJA’yî Alîye Toke ke vere hemsereka KCD’yî Leyla Guvene de manena vat, “Ganî kes nameyê nê xoverdayîşî yo ke 8’ê Adare ra dest pêkerdo bikero “Leyla.” Ganî ma a roje wina pênase bikerê.

Aktîvîsta TJA’yî Alîye Toke ya ke verê wextêkê nizdî Zîndanê Amedî ra vejîyaye nizdîyê 20 rojî yo ke verê Leyla Guvene de manena û şahidîya xoverdayîşê aye yê tarîxîyî rê kena. Toke qalê hetê xoverdayîşî yê zîndanî û teberî kerd. 

Toke seba ke nê xoverdayîşî rê şahidi bikero û seba ke verê Guvene de bimano senî ke zîndanî ra vejêna şina keyeyê Guvene. Toke ard ziwan ke vero ke aye şiro yewna ca ewilî şina keyeyê Guvene. Toke hîs û fikrê xo yê derheqê xoverdayîşî pare kerdî.

Xoverdayîşo Tarîxî Yê Zîndanê Amedî

Toke ard ziwan ke aye verî zî Guvene şinasnayêne, gama ke pîya Zîndanê Amedî de bîyê no naskerdişê înan hîna bîyo zêde û gama ke Guvene qerarê grevê vêşanîye dayo hayîya çewî nê ra çinêbîya. Toke vat, “Derheqê na babete de ne munaqeşeyêk kerd û ne zî îşaretêk da ke ma ci ra bikewê guman. Dima ra ma pê hesîyayî ke bi mengan serê çalakîya xo de fikirîyaya. Tîya ganî ma bale biancê serê muhîmîya Zîndanê Amedî. Zîndan hem bi xoverdayîşê xo hem zî bi barbarîya ke ûca amîya kerdene tarîxkîyîya xo paweno. Ma eşkenê vajê şexsîyetê tarîxîyî yê sey Sakîne Cansize, Xeyrî Dûrmûş û Alî Çîçek çalakîya Leyla Guvene de wayîrê rolêkê pîlî yê.”

Leyla Guvene Sey Xeyrîyî Mehkema De Qerarê Xo Pêhesna

Toke dewam de bale ante serê rojeyê mergî yê 14’ê Temmuze yê 1982’yî yê Zîndanê Amedî ke qadroyanê serkêşan ê ronayoxanê PKK’yî ra Mehmet Xeyrî Dûrmûşî salona mehkema de pêhesnabi ke o do dest bi çalakîye bikero û vat, “Leyla Guvene zî qerarê çalakîye mehkema de pêhesna. Xeyrî tarîxê ma yê ewroyî de zî ciwîyeno.”

Plansazîya Her Çîyî Kerda

Toke dewamê qiseykerdişê xo de vat Guvene her çî verî ra bi detay fikiryabî û plansazîya xo kerdebî, qerar dabi ke pê kelemçeyî tewrê mehkema nêbo, seba nê zî semedo ke SEGBÎS’î ra tewrê ci bibo waştişname da û peynî de zî qerarê xo bi rayîrê SEGBÎS’î da. Toke vat gama ke a agêraya koxuşe hal û meseleyî înan rê vato Mazlûm Dogan, Xeyrî Dûrmûş û barbarîya ke ê ciwîyayê ameyo aye vîrî û vat, “Ganî ma no xoverdayîşo ke 8’ê Adare ra dest pêkerdo “Leyla” bidê ci ra. Ganî a roje wina bêro pênasekerdene.”  

Çîyêk Qey Xo Nêwazena

Toke seba ke Leyla Guvene nas kerda û aye dir heman koxuşe de menda xo bisiûd vînena û vat gama ke aye qerarê na çalakîye dabi çîyêk seba xo nêwaştibi, peynîya peynî a parlamentera partîyêka sîyasî ya û eşkayêne seba xo çîyêk biwazo. La Guvene no nêkerd û nê vatî, “Bi temamî seba ke tecrîdê serê Rayberê Şarê Kurdî Abdullah Ocalanî wedarîyo dest bi na çalakîye kerd. Nê çîyî tesîrêko pîl mi ser o kerd. Nê halî heyecan û bawerîya mi hîna kerd xurt. Nizdbîyayîşê aye yê meseleyê cinîyan ez zêdetir anta ver bi xo. Ma senî Sakîneyan seba xo nimûne vînenê, ma Leyla Guvene zî a dereca de xo rê nimûne vînenê. Wina bi çend deqeyan her çî nêeşkeno bêro vatene. Seba qalkerdişê ci saetî, rojî lazim ê.”

Halê Weşîya Aye Xirab O La Qerarê Aye Zelal O

Toke dewam de vat halê Guvene ya weşîye xora rind nêyo, seba ke kemî rakewena û mirdîya xo hewn nêbena, tansîyonê aye tim biproblem o û bê ke bê hetkarîya înan nêeşkena hurzo, îhtîyacîyanê xo yê rojaneyan bi hetkarîya înan bi ca ana.

Toke vat ê derheqê tecrîd û çalakîyanê grevê vêşanîye de munaqeşeyan kene, qerardarîya Guvene zelal a û heta tecrîdê serê Rayberê Şarê Kurdî Abdullah Ocalanî nêwedarîyo a do çalakîya xo nêqedên û peynîya qiseykerdişê xo de no vat, “Heş û aqilê aye tim serê grevanê vêşanîye yê zîndanan û yê ke teber de yê û wayîrê qerardarî û bawerîyêka pîle yê ser o yo.”