Serdozgerê Komare yê Mehkemeya Berze Bekîr Şahînî semedê qefilnayîşê Partîya Demokratîke ya Şaran (HDP) Mehkemeya Qanûnê Bingeyî de dewa akerde. Cipêrsayîşo verên do yê dewa do 31ê adere de bêro kerdene. 30 serranê peyênan de partîyê kurdan sey HEP, OZDEP, DEP, HADEP, DEHAP û DTPyî ameyî qefilnayene la waştişê îqtîdaranê sîyasîyan nêameyî caardene. Her partîya newîye ke ameye akerdene dahîna bîye xurt.

Wekîlê HDPyî yê Amedî Îmam Taşçierî derheqê cehdkerdişê qefilnayîşê HDpyî yê îqtîdarê AKP-MHP-Ergenekonî de ANFyî rê qisey kerd.

Taşçierî ard ziwan ke Tirkîya de seba ke sîyaset tengayî de yo pê zextê vera kurdan wazenê nayî ra vejîyê û vat: ''Cehdkerdişê qefilnayîşê partîye do înan rê qet feyde nêkero. Îqtîdar hêrişê kurdan  û temsîlkaranê înan keno ke problemanê Tirkîya yê komelkîyan binimno. 5 serrî yo rojdemê welatî bi hêrişanê vera HDPyî meşkul kenê. Xora hukm destê îqtîdar de yo, coka beno ke ê HDPyî biqefilnê la na rewşe AKP bi temamî vînî keno. Tirkîya de hetê demokratîk vera nayî do tehemul nêkerê. AKP 2019 de bi hêrişê vera kurdan kewr vîjnayîş la kurdan Îstanbul û bajaranê pîlan de dersa înan daye ci. Nika wazenê eynî çî bikerê. Kurdî do narey zî dersa dîyine bidê ci.''

Taşçierî vist vîrî ke HDP her roje hem hetê îqtîdarî ra hem zî hetê muxlefetî ra yeno muneqeşekerdene û vat: ''Eke mesele kurdî bî muxalefet û îqtîdar cade benê yew. Îşxalê vera Rojawanî de teberê HDPyî de vengê kesî nêvejîya. Wextê tezkereyê Lîbya de pîya tênêgerayî. Cunku ûca kurdî çînêbî. Her roje televîzyonan de HDP yeno qalkerdene la ûca yew HDPyîj zî çîn o.''

Taşçierî vat: ''Ma wazenê wa kurdî cografyaya xo de xo îdare bikerê. Wa nasnameyê kurdan bêro naskerdene, perwerdeyê ziwanê dayîke bêro dayene û wa kurdî heme avajntajanê neteweyî ra îstîfade bivînê. Mesela ewro Hindistan de 17 ziwanê fermî estê. Reyna Pakistan de zî wina yo. Welatê ke se 'peynî de mendî' yenê namekerdene de zî rewşa wina ya. Qey eynî çî semedê kurdan nêbeno? Ma nê waştişan ser o sîyasetî aver benê. Vanê 'HDP welatî cîya keno'. Nê waştişê HDPyî çapemenîya neteweyî de ca nêgenê. Rixmê heme hêrişan Amede 10î ra 8 kesî reya xo danê HDPyî. Heme îstatîstîkî nayî ramojnenê.''