Wekîla HDPyî ya Agirî Dîlane Dîrayet Taşdemîr derheqê kerdişanê zîndanan de ANFyî rê qisey kerd.

Taşdemîre dîyar kerd ke rewşa zîndananê Tirkîya vurîyena coka her zînda seke warêko xoser o. Taşdemîre vat: ''Zîndanî rayaumûmîye rê girewte yê û Wezîrîya Edaletî derheqê rewşa zîndanan de agahîyêke nêdana. Wezîrîya Edaletî tek wezîfeyî kena, o wezîfe zî nimnayîşê sûcanê vera tepişteyan o. La karo esas ê înan vergirewtişê îşkenceyî yo.

Îqtîdarî xora wextê janî de desr na heqanê tepişteyan ser. Destûr nêdîyeno ke tepişteyî keyeyanê xo bivînê. Zîndanan de tecrîdêko giran est o. Tepişteyî selam bidê yewbînan zî ceza wenê.Kerdişê zîndanan aqilî ra dûr ê. Sîyasetmedara kurde Mukaddese Kubîlay ganî 4ê tebaxe de biameyêne veradayene la cezaya dîsîplînî ra vera nêdîyaye.''

Taşdemîre eşkera kerd ke mergê tepişteyan bi vateyê 'xo kişto' yenê nimnayene û vat: ''Nê mergî normal nîyê. Zîndan de xîretê şiknayîşê îradeyê tepişteyan est o, kerdişê xirabî est ê. Ganî ma hîna zaf bale biancê nê kerdişan ser. Tepişteyî hucreyê yewkesî de, hucreyê sungerînî de tepişîyenê. Verî dezgeh û rêxistinî eşkayêne zîndanan zîyaret bikerê. La nika destûr nêdîyeno ney. Ma rê zî destûr nêdîyeno ke ma şorê zîndanan. Ma wexto ke şîyî Zîndanê Patnosî îdareyê zîndanî ma de pêvînayîş nêkerd. Wexto ke tepişteyî xîret kenê ke îşkenceyê vera înan rojdem bikerê, ceza wenê.''