Seba turê diyînî yê weçînayîşê serekkomarîye yê Tirkîya teberê welatî de raydayîş dest pêkerd. Seba turê diyînî 73 welatan de 151 temsîlkarîyan de 3 hezar û 461 sindoqî ronîyayî. Weçînayîşî do mabênê Recep Tayyîp Erdoganî û Kemal Kiliçdarogluyî de bêro kerdene.

Teberê welatî de raydayîş do heta 24ê gulane dewam bikero Gumrukan de zî heta 28ê gulane saete 17.00 raydayîş do dewam bikero. 

Weçînitoxî ganî sîteya resmî ya Heyetê Weçînayîşî yê Berzî (YSK) de qeydê xo kontrol bikerê. Êyê ke qeydê înan çin ê ganî sersefîrîyanê herêma xo de qeydê xo virazê. 

Avusturalya

Goreyê agahîyanê ke Partîya Çep a Keske dayê, paytextê Sydneyî yê Avusturalya de seba weçînayîşî eleqeyêko pîl est o. Endamanê Koordînasyonê Weçînayîşî yê Partîya Çep a Keske vat: ''Roja verêne 1250 kesan raye daye. Ma seba ke weçînitoxan berê noqtayanê raydayîşî wesayîtî eyar kerdî.''

Fransa

Şaristanê Marsilya yê Fransa de Partîya Çep a Keske keye bi keye gêrena û kena ke şarî bera sindoqan ser. Zîyaretan de mesajê 'Ma karê xo yê nêmcetî temam bikerê' dîyeno. Şaristanê Marignane de zî Partîya Çep a Keske pê konvoyî keyeyan, esnaf û qewexaneyan zîyaret kena. 

Almanya 

Sere de şaristananê Kiel, Hamburg û Felnsberg de xeylêk cayan de şar serê sibayî ra nata seba raydayîşî rêz de yo. Verê sersefîrîya Hamburgî de rojnameger Adîl Yîgîtî, Wekîlê Partîya Çepe Metîn Kaya û Temsîlkarê Komelê Elewîyan Huseyîn Kayaturanî pare kerd ke ganî her kes şoro sindoqan ser.