Bi wesîleya serrgêra komploya mîyanneteweyîye ya 15'ê Sibate û roja 100'ine ya grevê vêşanîye yê Leyla Guvene, Taksîm Hîll Otelî de kombîyayîşê çapemenîye ame kerdene. Hemserekê Pêroyî yê HDP’yî Pervîn Buldane û Sezaî Temellî û parlamenterê HDP'yî, endanê rêxistene cimatî yê sivîlî, endamê heyetê rayberîye merkezî yê HDP'yî û parlamenterê HDP'yî yê Stenbolî tewrê kombîyayîşî bîyî.

FIKRÊ BIRÊZ OCALANÎ YÊ SERÊ AMEYOXÎ ZAF MUHÎM Ê

Buldane kombîyayîşî de qisey kerd û vat, Rayberê Şarê Kurdî Abdullah Ocalan beno 20 serrî ke Girewa Îmraliyî de yo, fikrê xo yê serê demokratîkbîyayîşê Tirkîya û Rojkewtena mîyanêne bi kitab, pawitiş, pêvînayîşanê avûkatan û heyatê sîyasî yê ke şinê Îmraliyî û yenê reyde pêroyîye de pare kerdê. Buldane vat, “Perspektîf û analîzê Ocalanî yê serê aşitî, azadî û derheqê ameyoxê Tirkîye zaf muhîm ê. Ma naye eşkerayîyan û kitabanê Ocalanî de zaf asan eşkenê etud bikerê.”

Buldane ‘proseyê çareserî ya pêvînayîşanê Îmraliyî‘  vist vîrî û va:‘‘ 5’ê Nîsane 2015’î de bi girankerdişê tecrîdî vernîya nê prosesî ame girewtene. Ocalan pêvînayîşê peyênî vat ke ‘Eke nê pêvînayîşê muzakereyî verê şahîdîya heyetanê muşahidan nêrê kerdene, no proses mîyan ra wedarîyeno û şima do reyêka bîne nêeşkenê bêrê tîya.’ Ma hemeyan no dî. Kamî ke destur nêda seba awankerdişê heyetê muşahidan û seba qedinayîşê prosesî tecrîdêko mutleq serê Birêz Ocalanî de ferz kerd, vernîya şîyayîş û ameyîşê ucayî girewt.

'OCALAN Û KURDAN VERNÎYA KOMLOYE GIREWTE‘

Ocalan bi fikranê xo prosesê komploya 20 serran pûç kerde. Şarê Kurdî vernîya prosesê komploye girewte. Eşkerayîyê ke ameyê kerdene ra yeno fam kerdene ke fikrê Birêz Ocalanî yê serê aşitî, demokrasî û azadî seba ameyoxê nê welatî muhîm o.”

GREVÊ VÊŞANÎYE

Buldane ard vîrî ke parlamentera înan Leyla Guvene 100 rojî yo ke grevê vêşanîye de ya û vat, “Bî 100 rojî ke Leyla Guvene grevê vêşanîye de ya. Hepsxaneyê Tirkîye de û Ewropa de zî 300 kesan ra zêde kesî grevê vêaşanîye de yê.” Buldane da zanayene, waştişê çalakwanan waştişê nemeşrû, bêhuquqî û waştişê zaf giran nîyê ke cewabê înan nêno dayene û vat, ma wazenê qanûne Tirkîya bêrê caardene. Seba ameyoxê Tirkîya, seba ameyêko demekoratîk no zaf muhîm o. Na polîtîkaya tecrîdî hema bêra wedarnayene, û edelat û huquq bêro caardene.”