Zîndanê Îmraliyî de 2022 de Rayberê Şarê Kurdî Abdullah Ocalanî de qet yew pêvînayîşê keye û avûkatan nêame kerdene. Pêvînayîşo peyên ê bi Ocalanî 2020 de ame kerdene. Serra 2021î de Rayberê Şarê Kurdî birayê xo Mehmet Ocalanî de bi kilmî telefon de qisey kerd. Êlula 2022yî de CPTyî Îmrali zîyaret kerd ke dima ame eşnawitene ke Ocalanî pêvînayîşê bi CPTyî red kerdo. CPTyî 'prosedur' kerd bahane û eşkerayîyêke nêdaye.

Komîteya Wezîran a Konseya Ewropa kombîyayîşê 2021î de waşt ke cezaya muebede ya vera Kurd Abdullah Ocalan, Hayatî Kaytan, Emîn Gûrban û Civan Boltanî wa çarçewa 'heqê hêvîye' de newe ra bêra ercnayene. La Tirkîya bi cezayanê dîsîplînî tim pêvînayîşê bi keye û avûkatan qedexe kerdî.

Avûkatanê Rayberê Şarê Kurdî Abdullah Ocalanî ra Ozgur Erolî derheqê zîyaretê CPTyî, muracatê avûkatan ê seba Neteweyanê Yewbîyayeyan (NY) de ANFyî rê qisey kerd.

Ozgur Erolî da zanayene ke 2022 de Îmrali de warê heqanê merdiman de qet yew çi nêvurîyayo û vat: ''2022 de tecrîd reyna bi giranêr. Nê prosesî de ablûqa û sîyasetê tecrîdî yê ke dormeyê meseleya kurdan de ameyê awankerdene, ver bi muxalîfan û hêzanê demokratîkan şinê. 2019 de çend pêvînayîşê bi avûkatan, 2020 de pêvînayîşê bi keyeyî û 2021 de pêvînayîşê bi telefonî ame kerdene. La di serran û nêm o qet yew pêvînayîş nêno kerdene. CPT û dezgehê bînî yê Konseya Ewropa rewşe teqîb kenê. La agahîya nêdanê. CPTy wexto ke tecrîd bi giranêr qetî Îmrali zîyaret nêkerd.

CPTyî israr û nêrazîbîyayîşan ra dima zîyaretê xo yo peyên kerd û şi Îmrali. La 'prosedur' xo rê kerd bahane û derheqê zîyaretî de eşkerayîyêke nêdaye. Goreyê agahîyanê ke ma girewtê, nê zîyaretê peyênî de Birêz Ocalanî pêvînayîşê bi CPTyî red kerdo. La CPTyî rixmê muracatanê ma zî derheqê zîyaretê xo de agahîyêke zî nêdaye. Ma reyna dezgehanê NYyî rê muracat kerd. La înan ra zî veng nêvejîyeno.''

Ozgur Erolî pare kerd ke cezayê dîsîplînî yê vera Ocalanî kayê huqûqî yê û cidî nîyê. Erolî vat: ''Nê cezayê dîsîplînî avûkatan ra zî nimîyenê. Rixmo ke ma bi desan reyî muracat kerdo û ma vato ke îtîraz bikerê reyna nê cezayî ma ra nimîyayî.''