Qezaya Novoaleksandrovskî de, Têgêrayîşê Ciwananê Kurdan ê Rûsya bi eşkerayîyêka çapemenîye tecrîdkerdişê Rayberê Şarê Kurdî Abdullah Ocalanî şermezar kerd.

Eşkerayîye verê Merkezê Kulturê Kurdî de ameye dayene û hetê Casmîn Amoyeva ra ameye wendene. Eşkerayîye de grevê vêşanîye yê seba weşîye û azadîya Ocalanî yenê kerdene ameyî vîrardene û ame vatene, “Waştişê çalakwanan ê ke çar mengan ra zêdeyo grevê vêşanîye de yê, ganî hetê hêzanê mîyanneteweyî û Neteweyê Yewbîyayeyan (NY) ra bêro dîyayene. Bêxemîya Rûsya ya ke emdamêka daîmî ya Neteweyê Yewbîyayeyan a, ma ciwanan ê ke Rûsya de ciwîyenê kena mîyanê fikaran. Na babete de Rûsya ganî rolêko hîna aktîf bigîro. Ganî Rûsya vera polîtîkayanê înkar û çinkerdişê şarê Kurdan de giranîya xo ya sîyasî nîşan bido û mudaxeleyê prosesî bikero.”  Eşkerayîye bi qîrayîşamê slogananê seba Ocalanî qedîyaye.