Wekîla Sosyalîste ya Rojhelatê Kurdîstanije Amînehe Kakabaveh tepişîyayîşê 70 cinî û pawitoxanê heqanê merdiman û qetilkerdişê kolberan ê Rojhelatê Kurdîstanî vist rojdemê Parlamentoya Swêdî.

Kakabavehe bi vernîyazêk waşt ke Wezîra Karanê Teberî Ann Linde seba ke tepişteyê sîyasî yê rojhelatijî vera bidîyê Îranî ra teda bikera.

Hewteyê vîyarteyî de wextê ercnayîşê vernîyazî de mabênê Kakabavehe û Linde de nîqaşêk qewimîya. Linda îdîa kerd ke ê tim tedayanê Îranî gênê rojdemê xo. La Kakabavehe waşt ke Swêd ganî bi hawayêkê xurtêrî tewirê xo vera Îranî bimojno.

Kakabavehe derheqê mesele de ANFyî rê qisey kerd û ard ziwan ke Îran zî Tirkîyazî terorîzm kenê, heqanê merdiman rê hûrmet nêkenê.

Kakabavehe vat: ''Rejîmê Îranî 70 kurd û belûcî tepiştî. Nê merdimî têna wazenê mîyanê şert û mercanê holan de biciwîyê. Îran sey Tirkîya merdimanê ke azadîye wazenê pê 'terorîzm' sûcdar keno. Nê wird welatan de dîktatorîye estê. Temsîlkarê Îranî zî nê prosesî de Ewropa de bi rehetî gêrenê, Neteweyanê Yewbîyayeyan û Yewîya Ewropa de qisey kenê. Ann Linde zî nînan goşdarî kena. Hukmatê Swêdî sûcanê Îranî peygoş keno. Nika Îran de 2 hemwelatîyê Swêdî tepişte yê. La Swêd bêveng o.''