Meclîsê Rayberdişî yê Têgêrayîşê Ciwananê Şorişgêran vera hêrişê qirkerdişî yê dewleta tirke yo ke 24ê nîsane de vera Herêmanê Pawitişî yê Medya dîya desptêkerdene eşkerayîye daye. Ciwanan da pêhesnayene ke ê zî tewrê hemleya seferberîye ya 'Bi ciwanê ke bîyî baz, Zagrosan de ver bi serkewtişî' bîyî.

Eşkerayîye de ame vatene ke înan bi tewrbîyayîşê endamanê Rayberdişê Meclîsî yê Fransa, Almanya û Swîsre kombîyayîşê xo yê meclîsî kerd û qerarê muhîmî girewtî.

Ciwanan vat: ''Senî ke yeno zanayene dewleta tirke ya îşxalkere û hemkaranê ci şexsê Rayberîye de vera têgêrayîş û şarê ma hêrişê xo demo peyên de zêdînayî. Hukmatê şerê taybetî yê AKP-MHPyî yo ke wazeno estbîyayîşê xo serê çînkerdişê kurdan ra bido domnayene heme îmkanê dewlete serferber kerdî. Sere se herême Metîna, Zap û Avaşînî yê Herêmanê Pawitişê Medya vera çar leteyanê Kurdîstanî û her cayo ke cigêrayîşê azadîye esto hêriş kenê. Polîtîkaya qirkerdişî sere de Îmrali de vera Rayberîya ma yena caardene. Seba ke uca netîce nêgirewte vera heme şarî anê ca. Ma nayî eşkera vejê Erdogan û çeteyê ci bi vazdayîşî peynîya xo anê.

Hêrişê îşxalî yê vera Metîna Zap û Avaşînî ke 24ê nîsane roja serrgêra Qirkerdişê Armenîyan de ame destpêkerdene tesaduf nîyo. Tîya mesajo eşkera yeno dayene. Yeno waştene ke qirkerdişê kurdan bêro temamkerdene. Gerîlayanê Azadîye yê Kurdîstanî ke xo bi felsefeya Rayber Apoyî xo şidnayo cewabo pîl da îşxalkeran û nika ra tarîxê azadîye yê şarê ma de cayê xo girewt. Xoverdayîşê gerîlayan o ke vera bi hezaran leşkeran, bi desan SÎHA, ÎHA, F-16, çeka kîmyewîye û heme tewirê çekan yeno dayene, têna tarîxê kurdan de nê morê xo dayo tarîxê şorişî yê dinya ro.

Ma pê bawer ê ke xoverdayîşê gerîlayan do ser bikewo la ma sey ciwananê Apoyîyî berpirsîyaranê xo zanê. Coka ma zî do her ca de pê çalakîyanê xo paştî bidê xoverdayîşê gerîlayan. Ma do bimojnê dost û dişmenî ke ciwanê fedayîyê Apoyî senî qerardar û têkoşêr ê. Ma pê hemleya seferberîye ya 'Bi ciwanê ke bîyî baz, Zagrosan de ver bi serkewtişî' Erdogan û çeteyanê ci qehr bikerê. Ma do hînî qala xo pê çalakîyanê xo vajê.  Na hela pê qale zî çalakîye zî yê ma yê. Wa çew/e mevajo ke 'çiwextî ça de çalakîye esta'  wa bêro zanayene ke 'her hele her ca de' ma do çalakîye de bê. Bi nê bawerî û hîsîyatî ma veng danê ciwanîya Kurdîstanî, ciwanîya şorişgêr, demokrat, antîfaşîst û enternasyonalîtî ke wa tewrê hemleya seferberîye bibê û têkoşînê azadîye de vera hêrişê topyekûnî yê faşîzmî xoverdayîşê topyekûnî pîl bikerê.''