Hetkarê Hemserekanê Pêroyîyan ê DEM Partî û Berpirsê Komîsyonê Weşan û Propagand yê DEM Partî Tayîp Temelî bi wesîleya Roja Rojnamegerîya Kurdan eşkerayîyêke daye.

Temelî vist vîrî ke 22yê nîsana 1898î de Kahîre de hetê Mîqdar Mîdhed Bedirxanî ra Rojnameya Kurdistanî amebi vetene û na roje sey Roja Rojnamegerîya Kurdan yena fîrazkerdene. 

Temelî pare kerd ke ê wextî ra nata rojnamegerê kurdî raştîyan teqîb kenê û resnenê şarî. Temelî bale ante ser ke serranê 90an ê tarîyan de zî rojnamegerîya kurdan rixmê her çî zî roşnîya xo pawite û bi qerardarî rayîrê xo rê dewam kerd. 

Temelî vat: ''Ma Roja Rojnamegerîya Kurdan sere de Mîqdat Mîdhed Bedirxanî rê pêro kedkar û xebatkaranê çapemenîya kurdan rê fîraz kenê. Ma şexsê Musa Anter, Gurbeteli Ersoz, Nagihan Akarsel, Hafiz Akdemîr û Huseyîn Denîzî de pêro şehîdanê çapemenîya kurdan bi rêz û minetî yad kenê. Vîrameyîşê înan, mîrasê înan ê têkoşînî û xoverdayîşê înan do tim rayîrê ma roşnî bikerê.''