Hetkarê Hemserekanê Pêroyîyan ê HDPyî Temelî dîyar kerd ke pawitişê sindoqan û raydayîşê seba partîya înan faşîzmî berpirsîyarîyêka tarîxî ya. Temelî vat: ''Ganî şewa 14ê gulane de bala şarî eşkerayîyanê merkezê ma yê pêroyî ser o biba.''
Hetkarê Hemserekanê Pêroyîyan ê HDPyî Tayîp Temelî derheqê weçînayîşan de ANFyî rê qisey kerd.
Temelî îfade kerd ke 14ê gulane de weçînayîşê tewr krîtîkî do bêrê kerdene û vat: ''Nê weçînayîşan de qederê rejîmî, qederê hêzanê demokrasî, rayîrê hîrêyînî do eşkera bibo. Ma sey HDP, Partîya Çep a Keske û mutefîqanê xo wazenê seserra diyîne ya komare bivurnê rejîmêkê demokratîkî. Coka ma nê weçînayîşî sey weçînayîşê demokratîkkerdişê komare vînenê. Her raya ke ma do bidê, her raya ke seba hêzanê demokrasî û sîyasetê hîrêyînî bidîya do îmkan û firsendî bida hêzanê demokratîkan. Her raya ke dîyena Partîya Çep a Keske do bida ruhê faşîzmî ro. Coka ma raydayîş, wayîrvejîyayîşê rayanê xo sey mesuldarî û erkêkê tarîxîyî vînenê. Ma nê vengdayîşî pêro weçînitoxan rê kenê.''
Temelî ard ziwan ke rejîmo nikayên hîna rehet binkewtişî qebul nêkero, seba ney zî muracatê hîleyan do bikero. Temelî vat: ''Ganî şarê ma bi îdîa, ercnayîş û şiroveyanê medyaya AKPyî nêkero. Na çarçewe de ma amadekarîyanê hîrayan kenê. Serê sindoqan de xeylêk muşahîdê ma do est bê. Muşahîdê ma wa cayê xo qetî terk nêkerê. Ganî çew pê plananê kaosî bawer nêkero. Wa şarê ma goş bido Partîya Çep a Keske, muxalafet û kanalanê muxalîfan. Wa şewa 14ê gulane de bala şarê ma eşkerayîyanê merkezê ma yê pêroyî ser o biba.''
