Serekwekîlê Grûba DEM Partî Sezaî Temellîyî meclîs de kombîyayîşê çapemenîye kerd û rojdem erjna.

Temellîyî qiseykerdişê xo de vera îdîaya "tecrîd çîn o" ya Wezîrîya Edaletî ya Tirkî nêrazîbîyaîş mojna û vat: "Wekîlanê ma pêro pîya muracatê Komîsyonê Heqanê Merdiman ê Meclîsî kerd û vat Îmrali de caardişê rejîmî yo îstîsna est o. Komîsyonî nuşteyo ke Wezîrîya Edaletî ra ameyo ma rê şawit û vano; Tecrîd çîn o. Senî çîn o? Biewnê 4 serrî û 1 aşmî yo pêvînayîşê keyeyî çîn o. 4 serrî û 8 aşmî yo pêvînayîşê avûkatan çîn o. 38 aşmî yo bêkomunîkasyonîya mutlaqe est a. Komîsyon senî ke pê aqilê ma bêqûnî bikero, vano seba ke ma qala tecrîdî bikerê ganî bêkomunîkasyonîya mutlaqe biba. Xora 38 aşmî yo xebere nînan girewtene. Derheqê weşîya Birêz Ocalanî de ma qet çîyêk nêzanî. Sebebê heme probleman tecrîdê Îmraliyî yo. Ma nê hinî zaf hole zanê. Seba ke nê krîzî biqedîyê, ganî tecrîd bêro wedaritene. Ma tîya ra reyna veng danê Komîsyonê Heqanê Merdiman ê Meclîsî ke wa wezîfeyê xo bîyaro ca. Ganî cade heyetêkê cipersayîşî şiro Îmrali."