Rayraşîyayîşê Demokrasîyî yê Vera Derbe yo ke HDPyî 15ê hezîrane de Colemêrg û Edîrne ra ver bi Anqara  dabi destpêkerdene vizêr pê eşkerayîyêka çapemenîye qedîya. Wekîlê HDPyî yê Wanî Sezaî Temellîyî eşkerayîye ra dima ANFyî reyde qisey kerd.

Temellîyî vat: ''Ma pê bawer ê ke meseleyê Tirkîya pê demokrasî û têkoşînî eşkîyenê çareser bibê. Meseleya bingeyî zî meseleya kurdan a. Tirkîya de kayêkê demokrasîyî yeno kaykerdene. Weçînayîşan de heqî yenê talankerdene. Ganî her çî ra verî haştîye estba. Ganî haştîya komelkîye bêra afernayene, tepişteyê sîyasîyî bêrê veradayene û dewleta huqûqî estba, tecrîd bêro qedînayene, xizanîye biqede. Vera sîstemê îqtîdarî ganî ma xo biresnê rayîrê hîrêyînî ke şar tewrê ci bibo.''

Temellîyî ard ziwan ke şarê kurdî rayberê haştîye yo û vat: ''Rixmê qedexeyan zî şarê kurdî tewirê xo yê seba demokrasîyî mojna. Ma pê coşêkî hetê terefgîranê haştîye ra ameyî pêşwazîkerdene. Rixmê qedexeyan zî ma tewirê xo mojna. Vera herême, vera şarê kurdî manîpulasyonê cidîyî estê. Hêrşê vera herême zî dewam kenê. Têgêrayîşê Pençe, hêrişê vera Rojawanî dewam kenê. Labelê rixmê nînan zî şar terefgîrê haştî û demokrasîyî yo. Ma ê pê coşêkî teqîb kerd. Hetê ma de têna zerrîwazê HDPyî çinbî. Dezgeh û rêxistinê sivîlî zî estbî. Çunke merdimî wazenê ke peynîya polîtîkayanê şerî wa bêra.''