Partîyî hetêk ra mîtînganê xo yê peyênan virazenê, hetê bînî ra seba reydayîş  û wayîrê sindoqan vejîyayîşî şarî heşar kenê û beyanatan danê. Hemserekê HDP’yî Sezaî Temellî wina vano: ”Ma do qeyûman def bikê û her cayê Tirkîya de faşîzmê îtîfaqê AKP-MHP’yî birijnê. Ganî ma wayîrê sindoqan bivejîyê û vera hêrişanê îqtîdarî miheqeq ser bikewê.

Temellîyî ajansê ANF’yî rê qisey kerd û derheqê rojdemî de cewab da persan.

Qiseykerdişê Temellîyî wina yo: “Hem cayê ke qeyûmî tayînê ci bîyê de, hem zî cayanê binan de, şar bi coş û kelecanîye beşdarê xebatan bi. Şarê ma bi qerardarîye şono weçînayîşî, çunke îradeyê ci ameyo gaspkerdene û vera tecrîd û îzolasyonî, hêrsê şarî bîyo berz. Şar do bi nê hêrsê xo şoro sindoqan ser û faşîzmî birijno.

Îqtîdar, endamê ci û bi taybetî zî Wezîrê Karanê Zereyî, qerardarîya şarî keno ke bi gefan, bi tedayan bişikno. La se kenê  wa bikê, şar do peyser game nêerzo. Şar senî ke 24’ê Hezîrane de wayîr vejîya, no weçînayîş de zî do şoro sindoqan ser û ci rê wayîr bivejîyo. Şarê ma do 31’ê Adare de bi reyanê xo, bi qerardarîya xo faşîzmê înan birijno û şaredarîyanê xo peyser bigîro.

Stratejîyê ma yê weçînayîşî zaf muhîm o û serkewte yo. Ma tirkîya rê rayîrê demokrasîyî akerdo. Cinîyî, ciwanî û pêro hêzê demokraîyî û  karker-kedkarî nê rayîrî de ameyê têhet. Ma qeyûman biruyê dê û her cayê Tirkîya de faşîzmê îqtîdarê AKP-MHP’yî birijnê. Naye ra zî reya xo dayene zaf muhîm a. Hetê bînî ra ma seba ewlehîya sindoqan zî amadekarîya xo kerda û no derheq de ma partîyanê binan ra hîna baş xebetîyayî. Wezîfedarê ma yê sere sîndoqan û dibistanan amade yê. Ma venga pêroyê partîyan zî da ke wa wayîrê sindoqan bivejîyê. No bi taybetî zî Kurdistan de zaf muhîm o. Ma do hem şorê sindoqan ser, hem zî sindoqan rê wayîr bivejîyê.”