Merkezê Komela Demokratîke  ya Kurdî yê Vîctorîa û Sydneyî ra heyetêk roja Dişemeyî seba waştiş û qasewtanê Kurdan Parlamentera Partîya Keskan Samantha Ratmane û Parlamenterê Partîya Lîberal Jûlîan Leese reyde pêvînayîş kerd.

Pêvînayîş de grevê vêşanîye yê vera tecrîdkerdişê Rayberê Şarê Kurdî Abdullah Ocalanî, binpankerdişê heqanê merdimanê Tirkîya, hêriş û tehdîdê dewleta Tirkî yê vera şarê Kurdî ameyî qiseykerdene.

Heyetê Kurdî dîyar kerd, grevê vêşanîye sewîyeya krîtîk de yê û selahîyetdaranê Awusturalya ra waşt ke zextê Tirkîya bikerê.

Reyna heyetî, wekîlan ra waşt ke waştişê Kurdan berê rojdemê meclîsî û paştî bidê kampanyaya  înan a îmzeyan ke no semed ra nêzdî de do dest pêbikera.

Heyetî bala ante serê hêrişanê dagirkerîyê Rojawan, têkoşînê Kurdan ê vera DAÎŞ'î û hemkarîya dewleta Tirkî ya bi DAÎŞ'î û waşt ke na babete bikewa rojdemê meclîsî.

Goreyê zanayîşê ke heyetî ra ameyê girewtene, parlamentera Partîyê Lîberale Jûlîan Leese vat ke seba tehdîdê hêrişanê dagirkerîyan ê dewleta Tirkî ê Wezîra Karê Teberî Marîse Payne ra waştişê pêvînayîşêkê do biwazê.

Parlamentera Partîya Keskan Ratmane zî vat ke, ê 8ê Gucige de derheqê rewşa Guvene de persêk pêşkêşê parlamentoyî bikerê.