Krîzo ekonomîk pandemî ra dima bi giranêr. 'Tedbîrê pandemî' zî zor danê esnafan. Pêro dinya de hukmatan pandemî de paştî daye esnaf û bêkaran la Tirkîya de hukmatî paştî nêdaye şar zû esnafan.

Nê prosesî de HDPyî 'Kombîyayîşê Nan û Karî' da destpêkerdene. HDP çarçewa na xebate de cirkar, dewij, karker, esnaf û berardoxan reyde ronişeno û xîret keno ke meseleyan çareser bikero. HDPyî xebata xo verî Amed de daye destpêkerdene.

Hetkara Hemserekanê HDPyî ya Komîsyonê Kede ra Berpirsîyare Şazîye Kose derheqê kombîyayîşanê Amedî de ANFyî rê qisey kerd.

Şazîye Kose pare kerd ke krîzo ekonomîk taxmînan ra zêdêr giran o û vat: ''Amed de tabloyê krîzî zaf xirab o. Amed de hûmara ciwanan ê bêkaran şaristananê bînan ra 3 qat zêde ya.  Odaya Zanaatkaran a Amedî kombîyayîşê ma de pare kerd ke pandemî ra nata 30 hezar kesî bêkar mendî û nê kesî zêdêr ciwan ê. Tewr tay 1000 esnafan zî dikanê xo qefilnayî, îflas kerd. Dewijî nêeşkenê mazot, ceyran û awe bigêrê. DEDAŞ zî dest nano motor û traktoranê dewijan ser. Amed de merdimî vêşan ê! Esnafî bi hawayêkê zelalî anê ziwan ke ê hetkarîye wazenê. Esnafî wazenê wa hukmat pakêta destekî bido înan û deynanê esnafan taloq bikero. Ganî Amed de warê îstîhdamî yê neweyî bêrê afernayene. Çunke pandemî ra dima sermaye zî remaya.''

Kose da zanayene ke înan xeylêk merdiman reyde pêvînayîşî kerdî û vat: ''Kombîyayîşê ma do dewam bikerê. Heta ke ma meseleyanê şarî çareser bikerê nê têkoşînî dewam bikerê. Mîsal ma wexto ke KHKyîjan reyde kom bîyî mi nînan de hêvî û têkoşîn dîyî. Ma zî do perpsektîf û çarçewa xo zêdêr hîra bikerê û seba çareserîyan formêk bidê xebata xo.''