Zîndanê Sîncanî de tepişteya nêweşa girane Ozge Ozbek 27ê teşrîna verêne ya 2020î de tumorê mezgî ra amelîyat bibî. Ozbeke 10ê temmuze de xo ra şîye, sereyê ci gina erdî ro û wedarîyaye nêweşxaneyî.

Doktorê/a nêweşxaneyî da zanayene ke tumorê Ozbeke aver şîyo û ganî cade a amelîyat biba. La rixmê hişyarîya doktorî/e zî Ozbeke reyna ameye berdene bi zîndanî.

Mêrdeyê Ozge Ozgur Ozbekî derheqê weşîya aye de wina vat: ''Ozge her dişeme ma rê telefon kerdêne. Seba ke a roje telefon nêkerd ma qerqilîyayî. Şewe ma zîndanî rê telefon kerd û rewşe musayî. Dima Ozge vat ke hişê ci şîyo û sereyê xo dayo erdî ro. Rixmo ke doktoran vato ke a ganî cade amelîyat biba gardîyanan Ozge berde zîndanî. Tim hişê ci şino.''

Ozge Ozbek rê 2011 de bi sûcdarîya 'endamîya rêxistine' cezaya zîndanî ya 6 serran û 3 mengan dîyabî.