Îdarekarê  Federasyonê Komeleyanê Huqûq û Paştdayîşî yê Keyeyanê Tepişteyan û Hukmwerdetan ê Medî (MED TUHAD FED) Salîh Tekînî derheqê rewşa tepişteyan û zextê dewlete yê vera zîndanî  de ANFyî rê qisey kerd.

Tekînî vat: ''Problemê tepişteyanê nêweşan çirey rojdemê esasî yê Tirkîya nêkewt. Nêweşê tepişteyî yê ke kewtî destan û nêeşkenê têna mikatê xo bî estê. Tepişteyî sînorê mergî de ya zî badê cuya xo vînîkerdişî yenê tehlîyekerdene. Derheqê nê problemî de ma zî tede dezgehê heqanê merdimanê xoseran bi desan reyî muracat kerd û raporî amade kerdî. Ma problem heta raportoranê  Tirkîya yê Yewîya Ewropa berd la rixmê naye heta ewro gamêke nêerzîyaye. Çareserkerdişê problemî caverd, nêweşê kronîkê ke teber de yê ê zî eştê zîndanan. Tewr peynî de zî Maya Haştîye Makbule Ozbek rixmê nêweşîya ci eşte zîndan.''

Tekînî bale ante bêvengîya muxalefetî û rêxistinanê sivîlan ê komelî ser û wina dewam kerd: ''Seba ke ê vera problemî pasîf ê no problem pîlêr beno. Seba ke tepişteyan rê wayîr nîno vejîyayene, cuya înan zafêr kewena binê rîskî . Xeylêk dezgehî tepişteyan rê eleqedar nêbenê, aye ra karê ma zî beno zehmet. Reyna ma nêresenê tay nêweşanê ke lîsteyê ma de ca genê. Seba ke ma têna muhatabê cewab nêdîyeno muracatanê ma.''

Salîh Tekînî derheqê xebata înan de zî nê vatî: ''Ma sey fedesrasyonî derheqê binpaykerdişê heqanê de raporan amede kenê û dezgeh û sazgehanê eleqedaran rê şawenê. Welat de hem têmîyankewtişê sîyasetî esto û hem zî çapemenîya muxalîfe binê zextî de ya. Coka  Xebatê ma zaf rey nînê vînayene. Ma nêeşkenê vengê xo bidê eşnawitene. Rixmo ke xebatê ma zelal û rayapêroyî dir akerdeyê, yeno xîretkerdene ke dezgehê ma sey îlegalî bêro ramotene. Ma nêeşkenê raporê xo yê zîndanî teber de eşkera bikerê.''