Tepişteyê ke Zîndanê Hûmara 2’yine yê Bandirma yê Balikesîrî de seba qedînayîşê tecrîdkerdişê Rayberê Şarê Kurdî Abdullah Ocalanî 70 rojî yo ke grevê vêşanîye de yê ANF’yî rê qisey kerd û derheqê xoverdayîş û halê zîndanî de hayîdarîyî dayî.

Tepişteyanê çalakwanan ra Ekrem Gunî derheqê amacê mücadeleye xo de vat, “Bêguman amacanê muhîman ra yew azadîya Rayberîya ma ya. Çunke azadîya Rayberîye azadîye Kurdistanî ya. Amaco demderg ê çalakîye no yo, amaco demkilm zî qedînayîşê tecrîdê serê Rayberîye yo.”

Serdar Taşkinî zî ard vîrî ke Ocalan tepişteyêko alelade nêyo û vat, “Ê cimat, erce cimatî û xeta azadîye şexsê xo de ardê têhet. Yanî o estbîyayîş o. Na yewe ra dewlete şexsê Rayberîye de cimatî bi temamî tecrîd kena.”

Mîkaîl Mûnganî zî bale ante ke çalakîya înan çalakîyêka seba heqan a û vat, “Waştişê ma o yo ke dewleta Tirkî goreyê qanûnanê xo tê bigêro.”

Sîpan Karabûlûtî zî ard ziwan ke amaç û sebebe çalakîya înan hendî hetê her kesî ra yeno zanayene û ê wazenê ke tecrîd bêro wedaritene û faşîzm bêro rijnayene.

Înan Soylemezî zî vat ke tecrîd dewamê komplo yo û vat, “Bi tecrîdî kenê ke Kurdan, îradeyê şaran û ameyoxê azadî yê merdimîye bikerê tenge mîyan, bênefes verdê. Ganî her kes nê rind fam bikero û goreyê nê tewirê xo ramojno.”

Halê Weşîye Yê Çalakwanan

Derheqê halê weşîye yê çalakwanan de Gunî ard ziwan ke her xoverdayoxî de problemê weşîye vejîyayê werte, labelê no çîyêko bewlîkerdox nêyo.

Taşkîn vat, “Weşîye û azadîye pîya benê. Gama ke merdim azad bo a game weşîya merdimî zî rind a. Bêguman tayê probleme fîzîkkîyî xo ramojnenê. La muhîm nêyê.”

Mûnganî zî vat dejê sereyi, dejê madeyî û problemê weşîye yê bînî netîceyê aleladeyî yê xoverdayîşî yê û vat ke se beno wa bibo heta çalakîye bi ser bikewo ê do çalakîya xo bidomnê.

Karabûlûtî bale ante serê problemê hesasbîyayîşê hemverê vengî, bêhewnmendiş, dejê sereyi, kemîkerdişê kilo, kemîbîyayîşê tansîyonî ûsn. û vat, “Bi hêzo ke ma embazanê xo yê destpêkî ra gênê m abi qerardarî çalakîya xo domnenê û nêverdanê ke problemê weşîye vernîya ma de bibê astengî.”

Motîvasyonê Seba Çalakîye

Derheqê motîvasyonê çalakîye de zî Ekrem Gunî vat, “Çinbîyayîşî ma ser o ferz kene, la ma ancax bi xoverdayîşî eşkenê estbîyayîşê xo bipawê. Bi nê hawayî ma eşkenê estbîyayîşê xo manidar bikerê.”

Serdar Taşkinî bale ante ke pîlîya amacî seba înan çimeyê motîvasyonî yo.

Mîkaîl Mûnganî ard ziwan ke 20 serrî yo ke girawa Îmraliyî de xoverdayîş esto û motîvasyonê înan o bingeyên girawa Îmrali ya.

Sîpan Karabûlûtî vat çalaki û amacê çalakîye ê motive kenê.

Sînan Soylemezî zî vat, “Rayberê ma sebebê estbîyayîşê ma yo. Ma hêz û manewîyatê xo Rayberê xo ra, felsefe û paradîgmaya ê ra gênê. Rayberîye afernayoxê cuya azade û manîdare yo.”

Şarî Rê Vengdayîş Û Waştiş

Çalakwanan veng da şarî û waşt ke xoverdayîşî rê wayîr vejîyê. Ekrem Gunî vat, “Problemo bingeyên ê nê dewrî azadkerdişê estbîyayîşê ma yê tarîxî yo. Çalakîya ma zî qismêkê nê cehdî ya. Ma pawenê ke şarê m abi tewrbîyayîş û qerardarîyêka pîle na çalakîya azadîye rê wayîr vejîyo, vengê xo tewrê vengê ma bikero. Çunke azadî bi tewrbîyayîşê şarî bena. Eke bin ê hawayî nêbo do tim kemî bimano.”

Serdar Taşkinî zî vat ke xoverdayîş ruhêk o, ruhê perçekerdişê tersê faşîzmî yo û veng da her kesî ke nê ruhî rind fam bikerê û ci rê wayîr vejîyê.

Mîkaîl Mûnganî vat, “Eke yeno waştene ke aşitî, demokrasi, heqê merdiman ê bingeyênî welat de serdest bo, ganî şarê bindestî bi xurtî tewrê çalakîye rê wayîr vejîyê.”